एकजना क्यानेडियन अधिकारीले घर फर्किन चाहने भुटानी शरणाार्थीबारे क्यानाडा सरकारले नेपाल र भुटान सरकारसँग वार्ता गरिरहेको बताएका छन् ।

३१ जेठ बिहान पूर्वी मोरङको शनिश्चरेस्थित भुटानी शरणार्थी शिविर पुगेका नेपालका लागि क्यानाडाका सहायक  राजदूत जेस डुटनले त शरणार्थीको स्वदेश फिर्ती चाहनालाई लिएर नेपाल र भुटान सरकारसँग वार्ता गरिरहेको बताए ।

“त्यस्तो वार्ताबाट हामी निकै नै आशावादी छौं,” शनिश्चरे शिविरमै आयोजित पत्रकारहरुसँगको संक्षिप्त भेटमा उनले भने, “नेपाल र भुटान दुवै देशसँग क्यानाडाको घनिष्ठ मित्रता भएकोले पनि हामीलाई आशावादी हुन सघाएको छ ।”

पुनर्वासका कारण शरणार्थीको संख्या घट्दै गएको उल्लेख गर्दै सहायक राजदुत डुटनले अब सानो संख्यामा रहेकाहरुको घर फिर्ती  आशा बढेको पनि बताए ।

साढे दुई लाख डलर सहयोगको घोषणा
सहायक राजदुत डुटनले भुटानी शरणार्थी सहायता कार्यको लागि संयुक्त राष्ट्रसंघीय शरणार्थी सम्बन्धी उच्च आयोगलाई २ लाख ५०हजार अमेरिकी डलर (नेरु करिब दुई करोड ६७ लाख) सहयोगको समेत घोषणा गरे ।

उनले शरणार्थी शिविरमा चालु मानवीय सहायता कार्यको निरन्तरताको लागि सो रकमले मद्दत पुग्ने विश्वास ब्यक्त गरे ।
गोपाल गडतौला, झापा

प्रतिकृया दिनुहोस