अस्पतालको लापर्वाहीले बिरामीको मृत्यु भएको भन्दै आफन्त आन्दोलित, अस्पतालद्धारा छानबिनको आश्वासन

छानबिनको माग गर्दै आफन्त । तस्वीरः दीपक ज्ञवाली

–दीपक ज्ञवाली, बुटवल

बुटवलको लुम्बिनी अञ्चल अस्पतालले उपचारमा लापरबाही गर्दा आफ्नो बिरामीको मृत्यु भएको भन्दै आफन्तहरु आन्दोलित भएका छन् ।

रुपन्देहीको तिलोत्तमा नगरपालिका–१६, गणेशनगरका विशाल हिताङ(१६)लाई सर्पले डसेपछि आफन्तले अस्पतालमा उपचारका लागि पुर्याएका थिए । अस्पतालले भरतपुर रिफर गर्यो र, भरतपुरको अस्पतालले ढिला आएको भन्दै सोही दिन मृतक घोषणा गर्यो ।

हातमा सर्पले टोकेको भएपनि रिफर गर्दा अस्पतालको रिपोर्टमा खुट्टामा टोकेको लेखिएको र ढिलो रिफर गरेकाले मृत्यु भएको भन्दै आफन्त आक्रोशित भएका हुन् । राति सुतेको समयमा ३० जेठमा सर्पले टोकेपछि आफन्तले भोलिपल्ट बिहान लुम्बिनी अञ्चल अस्पतालमा लगेका थिए ।

अस्पताल पुग्दासम्म सामान्य अवस्थामा रहेका हिताङलाई दुई घण्टा उपचारपछि आइसीयु खाली नभएको कारण देखाउदै भरतपुर रिफर गरेको आफन्तले बताए ।

भरतपुरमै उपचारको क्रममा उनको मृत्यु भएको हो । । मृतकका बाबु तिलक हिताडले हातमा सर्पले टोकेकालाई खुट्टामा लेखिएको, ढिलो रिफर गरिएको र गलत रिपोर्ट दिएका कारण छोराको मृत्यु भएको दावी गरे ।

आफन्तहरुले घटनाको सत्यतथ्य छानविन गरी दोषीलाई कारबाहीको माग गर्र्दै अस्पताल प्रशाशनलाई पत्र बुझाएका छन् । तीन दिनभित्रमा घटनाको सत्यतथ्य छानबिन गरी दोषीलाई कारवाही नभए थप आन्दोलन गर्ने उनीहरुको चेतावनी छ ।

३२ जेठ विहान अस्पताल परिसरमा पत्रकार सम्मेलन समेत आयोजना गरी अस्पताल र चिकित्सकका नाममा पटक पटक विरामीमाथि हुने गल्ती सच्चाउन माग गरेका छन् ।

ध्यानाकर्षणपत्र बुझाउँन गएका आफन्तलाई अस्पतालका मेडिकल सुपरिटेन्डेन्ट डा. विकासदेवकोटाले तत्काल घटनाको छानबिन गरी तथ्य बाहिर ल्याउने बताए ।

उक्त अस्पतालमा केही बर्षअघि पनि अर्कै खुट्टामा समस्या भएकी पाल्पाकी एक बालिकाको अर्कै खुट्टामा अप्रेशन गरिएको थियो ।

प्रतिकृया दिनुहोस