माेर्चाकाे बैठकमा सहभागी नेताहरु ।

मधेशी मोर्चासहित आन्दोलनरत संघीय गठबन्धनले सरकारले वार्ताको वातावरण बनाए वार्तामा बस्ने निर्णय गरेको छ ।

तीनकुनेस्थित संघीय समाजवादी फोरम नेपालको कार्यालयमा २ असार साँझ बसेको गठबन्धनको बैठकले जारी आन्दोलनका कार्यक्रमलाई यथावत राख्दै आफ्ना मागप्रति सरकार लचकताकासाथ प्रस्तुत भए वार्तामा जाने निर्णय गरेको हो ।

वार्ताको उपयुक्त वातावरण बने सरकारसँग वार्ता गर्ने निर्णय भएको गठबन्धनको एक घटक सद्भावना पार्टीका सहअध्यक्ष लक्ष्मणलाल कर्णले बताए ।

“हामी पहिला पनि वार्ताकै पक्षमा थियौँ, वार्ताको वातावरण बनाएको खण्डमा अहिले पनि वार्ताबाटै समस्याको समाधान चाहन्छौँ, यसप्रति सरकारले गम्भीरता देखाउनुपर्छ,”, उनले भने ।

यसैबीच, गठबन्धनको बैठकलगत्तै बसेको संयुक्त लोकतान्त्रिक मधेशी मोर्चाको बैठकले पनि सरकारले वार्ताको वातावरण बनाएमा वार्तामा बस्ने निर्णय गरेको छ । बैठकले मधेशी मोर्चामा आबद्ध संघीय गठबन्धनलाई पनि वार्तामा बोलाउन सरकारको ध्यानाकर्षण गराएको सद्भावना सहअध्यक्ष कर्णले बताए।

उनले मोर्चाको पछिल्लो मधेश आन्दोलनमा घाइतेको उपचार खर्च, न्यायिक छानबिन आयोग गठनलगायत ४ बुँदे मागप्रति सरकारले लचकता अपनाए वार्ताका लागि आतुर रहेको बताए ।

प्रतिकृया दिनुहोस