प्रहरीको केन्द्रीय अनुसन्धान ब्यूरो (सीबीआई) को टोलीले वीरगञ्जबाट ९ जना डाक्टरलाई पक्राउ गरेको छ ।

मेडिकल शिक्षा (एमबीबीएस) पढ्दा आइएससीको नक्कली प्रमाणपत्र पेश गरेको आरोपमा सिबिआईले ९ जना चिकित्सकलाई पक्राउ गरेको हो ।

पक्राउ पर्नेहरुमा नाराणी अस्पतालमा कार्यरत सरोज सिंह, कुशराज गिरी, पन्नालाल पटेल र अरुणकुमार गुप्ता छन् । त्यसैगरी नेशनल मेडिकल कलेजमा कार्यरत मो. रहुल्ला खान, निमिषरमण पाल र इर्साद उलहक छन् भने वीरगञ्जमा क्लिनिक सञ्चालन गरिरहेका दिनेश साह पनि पक्राउ परेका छन् । पक्राउ परेका अन्य एक जनाको नाम खुलेको छैन ।

पक्राउ परेका सबैलाई  केहीबेर जिल्ला प्रहरी कार्यालयमा राखी काठमाडौंतर्फ लगिएको छ  ।

पक्राउको विरोध
९ जना डाक्टर पक्राउ परेपछि नेशनल मेडिकल कलेज र नारायणी अस्पतालका डाक्टर र कर्मचारीहरुले विरोध गरेका छन् ।

उनीहरुले अस्पतालमा काम गरिरहेका चिकित्सकलाई अप्रेशन थियटर, आकस्मिक कक्षबाट पक्राउ गरेर अस्पतालको संवेदनशीलतालाई प्रहरीले बेवास्ता गरेको आरोप लगाएका छन् ।

करिब २० जनाको संख्यामा जिल्ला प्रहरी कार्यालयमा भेला भएका डाक्टर र कर्मचारीहरुले नाराबाजी समेत गरेका छन् ।

डाक्टर पक्राउको विरोधमा अहिले वीरगञ्जका अधिकांश क्लिनिकहरु समेत बन्द गरिएका छन् भने नारायणी अस्पतालमा पनि इमर्जेन्सी बाहेकको सेवा अघोषित रुपमा बन्द छ ।
जियालाल साह, वीरगञ्ज

प्रतिकृया दिनुहोस