जिरानी, सावारस्थित जिमनेजियम हलमा सञ्चालित प्रतियोगितामा नेपालले १० स्वर्ण, सात रजत र तीन कास्यसहित टिम च्याम्पिन बनेको नेपाल जुडो सङ्घका अध्यक्ष दीपक हर्ष बज्राचार्यले जानकारी दिए । प्रतियोगितामा आयोजक बङ्गलादेश आठ स्वर्ण पदकसहित दोस्रो र अफगानिस्तान छ स्वर्णसहित तेस्रो भएको छ ।

नेपाली खेलाडी अमिता श्रेष्ठले १०–१३ उमेर समूहको २५ केजी मुनिको खेलमा बङ्गलादेशकी समिना खातुनलाई पराजित गर्दै स्वर्ण पदक हात पारिन् । सोही उमेर समूहको २८ केजी मुनिमा नेपालकी शक्ति थापा तेस्रो भइन् । ३२ केजी मुनिमा नेपाली खेलाडी देवकी माया श्रेष्ठले बङ्गलादेशकी कोविता खातुनलाई फाइनलमा पराजित गरिन् ।

छत्तीस केजी मुनिमा रेखा सुनुवार र ४० केजी मुनिमा सुजी श्रेष्ठ दोस्रो स्थानमा चित्त बुझाउन बाध्य भए । त्यस्तै ४० केजी माथिको खेलमा अञ्जली श्रेष्ठ तेस्रो भइन् । सोही उमेर समूहको पुरुषतर्फको खेलमा नेपाली खेलाडी सुवोध मण्डलले बङ्गलादेशका मोहमद अशकलाई पराजित गर्दै स्वर्णं पदक प्राप्त गरे । त्यस्तै ३० केजी मुनिमा नेपाली खेलाडी अजय बालक दोस्रो भए । चौत्तीस केजी मुनिमा सुवेन खड्गीले बङ्गलादेशी थोवेलाई पराजित गर्दै स्वर्ण आफ्नो हात पारे । ३८ केजी मुनि नेपाली खेलाडी निशन लिम्बु अफगानी खेलाडी नादर शाहसँग पराजितहुँदै रजतमा खुम्चिए । ४२ केजी मुनिमा सनिस शाही खड्गीले बङ्गाली खेलाडी अमिरुल स्लामलाई पाखा लगाए ।

बङ्गलादेशले आयोजना गरेका दोस्रो संस्करणको प्रतियोगिताअन्तर्गत १३ देखि १६ वर्ष उमेर समूहको महिलाको ३६ केजी मुनिको खेलमा नेपाली खेलाडी विष्णु माया वाईवाले बङ्गलादेशकी खेलाडीलाई पराजित गर्दै स्वर्ण प्राप्त गरिन् । ४० केजी मुनिमा भने नेपाली खेलाडी पुजा कार्की बङ्गलादेशकी सकिला खातुनसँग पराजित भइन् । ४८ केजीमा रन्जना खड्का प्रथम भइन् । ५२ केजी मुनिमा मनिता श्रेष्ठ प्रधान बङ्गलादेशकी सुमरीया अख्तरसँग पराजित भइन् । ५२ केजी माथिमा दीपा गुरुडले बङ्गलादेशकी दासु सिंह चौधरीलाई पराजित गरिन् ।

सोही उमेर समूहको पुरुष ४० केजी मुनिमा नेपालका ईन्द्रबहादुर श्रेष्ठले स्वर्ण चुमे । ४५ केजीमा युवराज श्रेष्ठले बङ्गलादेशका इकरामुल हुसेनलाई पाखा लगाए । ५५ केजीमा हिमपर्व खत्रीले रजतमा चित्त बुझाए । ६० केजी मुनि र माथिमा नेपाली खेलाडी क्रमश सुशान केसी र अलानुस अन्सारी तेस्रो भए ।

नेपाललगायत बङ्गलादेश र अफगानिस्तानका पुरुष र महिला गरी १२ देखि १६ वर्ष उमेरका करिब ९७ खेलाडीले विभिन्न तौल समूहमा २४ स्वर्ण पदकका लागि प्रतिस्पर्धा गरेका थिए । प्रतियोगितामा नेपालका तर्फबाट १० पुरुष र ११ महिला गरी २१ खेलाडी, बङ्गलादेशका तर्फबाट ३६ पुरुष र ३२ महिला र अफगानिस्तानका तर्फबाट ७ पुरुष खेलाडीले सहभागिता जनाएका थिए ।

प्रतियोगिताको तेस्रो संस्करण श्रीलङ्कामा आयोजना हुने छ ।

प्रतिकृया दिनुहोस