अख्तियार दुरुपयोग अनुसन्धान आयोगले डा. गोविन्द केसीलाई मानसिक उपचारको व्यवस्था गर्न सरकारसँग आग्रह गरेको छ ।

अख्तियार प्रमुख लोकमासिंह कार्कीले व्यापारिक स्वार्थमा मेडिकल शिक्षा धरासायी बनाइरहेको भन्दै उनलाई महाअभियोग लगाउन माग गरिरहेका केसीलाई अख्तियारले ‘भ्रष्टहरूको माखेसाङ्गलोमा जेलिएर भ्रष्टचारीको प्रायोजित अभियन्ता बनेको’ समेत आरोप लगाएको छ ।

अख्तियार प्रवक्ता कृष्णहरी पुस्करले आज, १२ असारमा विज्ञप्ती जारी गर्दै बारम्बार आफ्नो न्यूनतम आचरण र जिम्मेवारीको दायराबाट बिमुख भएको भन्दै ‘डा. केसीको मानसिक उपचारको शीघ्रातीशीघ्र उचित व्यवस्था गर्न’ सरकारलाई अनुरोध गरेका हुन् ।

डा. केसीलाई मेडिकल माफीयाहरुसँग सानिध्यतामा रहेको आरोप लगाउँदै अख्तियारको विज्ञप्तीमा भनिएको छ, ‘संगठित अपराधी र भ्रष्टहरूसँग उहाँ (केसी) को साँठगाँठ आयोगको दृष्टिबाट ओझेलमा छैन ।

भ्रष्टाचार, अनाचार एवं सबैखाले बिसंगति विरुद्धको महाअभियानमा क्रियाशील आयोगका माननीय प्रमुख आयुक्त र आयुक्तहरुप्रति लक्षित डा. केसीको माग छुद्रता, अराजकता र अस्वस्थ मानसिकताको द्योतक हो भन्ने आयोगको ठम्याई छ ।’

‘अख्तियार प्रमुख वा अन्य पदाधिकारीले आफ्नो र आफन्तको निहित स्वार्थका लागि चिकित्सा क्षेत्रमा भर्ना गरेको, स्वास्थ्य तथा चिकित्सा क्षेत्रको सुधारको प्रक्रिया अबरुद्ध तुल्याएको, भ्रष्टहरुलाई संरक्षण दिएको र कुनै पदाधिकारी बिशेषलाई सौदाबाजीमार्फत राजीनामा दिन वाध्य तुल्याएको’ भन्ने डा. केसीका आरोपलाई अखितयारले तुच्छ अभियोग भन्दै त्यसको तथ्यगत पुष्टीका गर्न डा. केसीलाई चुनौती दिएको छ । डा. केसीले विगतका आन्दोलनमार्फत ‘स्वास्थ्य क्षेत्रलाई नै बन्धक बनाउँदै विनाश र अबनतिको दिशातर्फ प्रवाहित गरेको’ अख्तियारको आरोप छ ।

अख्तियार प्रमुख कार्कीले परिवारको व्यापारिक स्वार्थका लागि मेडिकल शिक्षा धरासायी बनाइरहेकाले उनलाई महाअभियोग लगाउन माग गर्दै डा. केसीले आगामी २६ असारबाट अनसन बस्ने घोषणा गरेका छन् ।

आजै, १२ असारमा पत्रकार सम्मेलन गरी डा. केसीले अख्तियार प्रमुख विरुद्धको आफ्नो अनसनको जानकारी गराएपछि अख्तियारले विज्ञप्ती जारी गरेको हो ।

हेर्नुहाेस् विज्ञप्ती

याे पनि पढ्नुहाेस्ः ‘जनहितका लागि अख्तियार प्रमुखलाई महाअभियोग लगाउनुपर्छ’

अपरेसन बेथिति

प्रतिकृया दिनुहोस