समाचारबिहीबार, आषाढ १६, २०७३

नयाँ शक्तिको नाममा अशुली गर्ने हतियारसहित पक्राउ

हिमालखबर

हतियार देखाएर व्यावसायीहरुसँग रकम अशुल्दै आएका ललितपुर उपमहानगरपालिका–७, ट्यागलका विकास महर्जन (४४)लाई प्रहरीले नियन्त्रणमा लिएको छ ।

हिसिला यमीसँग महर्जन (बाँया) । उनले अाफू नयाँ शक्तिकाे कार्यकर्ता भएकाे देखाउन भाइबरमा पठाएकाे तस्वीर ।

हिसिला यमीसँग महर्जन (बाँया) । उनले अाफू नयाँ शक्तिकाे कार्यकर्ता भएकाे देखाउन भाइबरमा पठाएकाे तस्वीर

सामाजिक सञ्जालमार्फत् हतियारसहितको तस्वीर पठाउने र मार्नेसम्मको धम्की दिदै अशुली गर्ने महर्जनलाई महानगरीय प्रहरी अपराध महाशाखाले नियन्त्रणमा लिएको हो । महर्जनलाई हतियारसहित पक्राऊ गरिएको ललितपुरका प्रमुख जिल्ला अधिकारी ऋषिराम शर्माले बताए ।

बाबुराम भट्टराईसँग महर्जन ।

बाबुराम भट्टराईसँग महर्जन

उनका अनुसार महर्जनलाई जावलाखेल प्रहरी वृत्तमा राखेर अनुसन्धान प्रक्रिया अघि बढाइएको छ । पेस्तोलसहित पक्राऊ परेका महर्जन विरुद्ध विभिन्न अपराधमा निवेदन परेको प्रजिअ शर्माले बताए ।

महर्जनले भाइबर तथा फोनमार्फत् धम्की दिएर अशुली गर्दै आएका थिए । उनले ट्यागल क्षेत्रमा आफू नयाँ शक्तिका संयोजक बाबुराम भट्टराई र भट्टराई पत्नी हिसिला यमीको मान्छे भएको भन्दै धम्क्याउने गरेका छन् । यसअघि माओवादीको नामबाट अशुली गर्ने महर्जन बाबुराम भट्टराईले नयाँ शक्ति खोलेपछि उक्त पार्टीको कार्यकर्ता बताउन थालेका हुन् ।

यसअघि पनि विभिन्न पटक–पटक पक्राऊ परेका महर्जनलाई तुरुन्तै छोडिन थालेपछि उजुरी नै दिन छाडेको एक स्थानीयले बताए । तर, लगातार ठूलो रकमको माग गर्दै अपहरण र मार्नेसम्मको धम्की दिन नछाडेपछि कार्बाहीको माग गर्दै ट्यागलका स्थानीयले १६ असारमा ललितपुर प्रशासनमा सामूहिक उजुरी समेत दिएका छन् ।

महर्जनले अशुलीका क्रममा भाइबरमार्फत् पठाएका हतियारसहितकाे तस्वीरहरु ।

महर्जनले अशुलीका क्रममा भाइबरमार्फत् पठाएका हतियारसहितकाे तस्वीरहरु

यसअघि लुम्बिनीस्थित होटल लिटल बुद्धका सञ्चालक प्रविन शाक्यलाई गोली प्रहार गरेपछि प्रहरीले महर्जनलाई नियन्त्रणमा लिएको थियो । तर, होटलमै आएर गोली चलाएका मर्हजनलाई २४ दिनभित्रै छोडिएको थियाे । यसपछि पनि मर्हजनले धम्क्याएर अशुली गर्न छाडेका थिएनन् ।

ट्यागलका स्थानीयले प्रशासनमा दिएकाे उजुरी ।

ट्यागलका स्थानीयले प्रशासनमा दिएकाे उजुरी

 

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...