समाचारसोमबार, आषाढ २०, २०७३

न्याय माग्दा हिरासत

हिमालखबर

gangai‘पञ्चायत’ को शरणमा पुगेको प्रहरीले पीडित कौशल्यादेवीलाई नै ‘दोषी’ बनायो ।

पोखरिया–५, मोरङकी कौशल्यादेवी गनगाई ८ असार मध्याह्न खेतमा मुङको दाल टिप्दै थिइन् । पछाडिबाट कसैले लुगा तान्न खोज्यो । कौशल्या एकाएक चिच्याएको आवाज सुन्नेवित्तिकै छिमेकी मञ्जु गहदार दौडिंदै आइपुगिन् । त्यसपछि मात्र धर्मचन्द मण्डल कुलेलम ठोके ।

मण्डलको हातपातविरुद्ध कौशल्याले त्यही दिन इलाका प्रहरी कार्यालय, रंगेलीमा उजुरी दिइन् । मण्डल पक्राउ परे । तर, ‘गाउँको कुरा गाउँमै मिलाउने’ भन्दै ठूलो हूल प्रहरी कार्यालयमा आएपछि भोलिपल्ट ९ असारमै मण्डल छुटे । ११ असारमा प्रहरी कार्यालयमै गाउँलेको ‘पञ्चायत’ बस्यो ।

पञ्चायतीले कौशल्याले हुँदै नभएको आरोप लगाएर मण्डललाई एक दिन थुनाएको भन्दै उनीलाई पनि एकदिन थुनाउनुपर्ने दबाब दियो । गाउँलेको दबाबसामु प्रहरी निरीक्षक अभिचन्द्र रिजाल निरीह बने । न्याय पाउन प्रहरी शरणमा पुगेकी कौशल्या आफैं थुनिइन् ।

“मेरा लागि बोलिदिने कोही भएन”, हिरासतमै रहेकी कौशल्याले भनिन् । १२ असारमा हिरासतमुक्त हुनुअघि उनलाई ‘आइन्दा मण्डलसँग हेराहेरसमेत नगर्ने’ लिखतमा ल्याप्चे लगाउन बाध्य पारिएको थियो । पञ्चायतको निर्णयअघि प्रहरी मूकदर्शक बनेको थियो । प्रनि रिजाल स्वयंले गाउँलेको दबाबमा परी कौशल्यालाई हिरासतमा राख्न बाध्य भएको स्वीकार गरे ।

मण्डलले वैशाख २०७२ मा कौशल्यालाई दुव्र्यवहार गरेका थिए । यो थाहा पाएर उनका श्रीमान् र देवरले मण्डललाई कुटपिट गरेका थिए ।

“त्यसबेला घाइते मण्डलको उपचार र क्षतिपूर्तिमा रु.५० हजार खर्च भएको थियो”, कौशल्याकी आमा जितनी गनगाईले भनिन् ।

कौशल्याका श्रीमान् र देवर गएको वैशाखमा मात्र रोजगारीका लागि विदेश गएका थिए । “त्यसैको बदला लिन उसले फेरि छोरीमाथि आक्रमण गरेको हो”, आमा जितनीको भनाइ छ ।

उनका अनुसार, गत वर्ष पनि मण्डलले गाउँकी अर्की महिलालाई दुव्र्यवहार गरेका थिए । पञ्चायतले मण्डललाई क्षतिपूर्ति पनि तिराएको थियो ।

“एउटा गल्ती लुकाउन अर्को गल्ती गरेर प्रहरीले विधिको शासनको उपहास गरेको छ”, मानवअधिकार संजालका पूर्वाञ्चल संयोजक सोमराज थापाले भने ।

पीडितलाई नै हिरासतमा राखिएको बारे विराटनगरस्थित राष्ट्रिय मानवअधिकार आयोगले १३ असारमा सात दिनभित्र लिखित जवाफ दिन प्रहरीलाई निर्देशन दिएको छ ।

जिल्ला प्रहरी कार्यालय, मोरङका प्रहरी उपरीक्षक सन्दीप भण्डारीले भने महिलाको सुरक्षाकै लागि एकदिन हिरासतमा राखिएको दाबी गरे ।
कमल रिमाल, विराटनगर

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...