पर्सा जिल्ला अदालत

नक्कली प्रमाणपत्र पेश गरी चिकित्साशास्त्र अध्ययन गरेको अभियोगमा वीरगञ्जबाट पक्राउ परेका डाक्टरहरु धरौटीमा रिहा भएका छन् ।

आज जिल्ला अदालत पर्साका न्यायाधीश मोहम्मद जुनेद अजादको इजलासले उनीहरुलाई धरौटीमा रिहा गर्ने आदेश दिएको हो ।

पक्राउ परेकामध्ये रामकुमार प्रधान रु ७ लाख ६५ हजार, दिनेशकुमार साह तेली रु १८ लाख, कुशराज गिरी रु ४ लाख, इर्सादुल हक रु ३ लाख ७५ हजार, पन्नालाल प्रसाद पटेल रु १५ लाख, निमेश पालरमन रु २ लाख, सरोजकुमार सिंह रु १० लाख र मोहम्मद रुहुल्ला रु ३५ लाख धरौटी लिई रिहा गर्न अदालतले आदेश दिएको छ ।

आदेश अनुसार अन्य रिहा भइसकेका छन् भने धरौटी बुझाउन नसकी जेल चलाउन भएका पन्नालाल पटेल र मोहम्मद रुहुल्ला कारागार चलान भएका छन् । उनीहरु दुबैजनाको स्वास्थ्य अवस्था ठिक नभएको भन्दै अस्पताल लगिएको छ ।

केन्द्रीय अनुसन्धान ब्यूरोको टोलीले ९ जना डाक्टरलाई नक्कली प्रमाणपत्र पेश गरी चिकित्साशास्त्र अध्ययन गरेको आरोपमा गत ३ असारमा वीरगञ्जबाट पक्राउ गरी काठमाडौं लगेको थियो ।

थप अनुसन्धानका लागि काठमाडौं जिल्ला अदालतबाट ५ दिन म्याद थप गराएको प्रहरीले त्यसपछि कार्वाहीका लागि सम्वन्धित जिल्ला (पर्सा) पठाएको थियो । वीरगञ्जबाट पक्राउ परेका ९ जनामध्ये एकजना बाराका भएकाले उनको बारा जिल्ला अदालतमा मुद्दा चलिरहेको छ ।

जियालाल साह, वीरगञ्ज

प्रतिकृया दिनुहोस