सामाजिक सञ्जालमा सक्रिय युवाहरुले अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीलाई महाभियोग लगाउनका लागि नेकपा एमाले र पार्टी कार्यालय मार्फत प्रधानमन्त्री केपी ओलीलाई समेत ज्ञापनपत्र बुझाएका छन् ।

अख्तियार प्रमुख कार्कीका अलोकतान्त्रिक गतिविधिहरुको विरोध गर्दै विभिन्न अभियान सञ्चालन गरिरहेको युवा समूहले आज, २१ असारमा कार्कीविरुद्ध संसदमा महाभियोग लगाउन भन्दै एमाले पार्टी कार्यालयमा ज्ञापनपत्र बुझाएको हो ।

ज्ञापनपत्र एमाले पार्टी कार्यालय सचिव कृष्ण गोपाल श्रेष्ठले बुझेका थिए भने त्यसअवसरमा पार्टी केन्द्रीय सचिव योगेश भट्टराईको पनि उपस्थिति थियो ।

ज्ञापन पत्र बुझ्दै श्रेष्ठले नेकपा एमाले सधै विधिको शासनको पक्षमा रहेको र कुनै पनि बहानामा हुने गैर लोकतान्त्रिक क्रियाकलापहरुको एमालेले विरोध गर्ने बताए ।

उक्त अवसरमा अभियन्ता डा. जितेन्द्र उपाध्यायले प्राज्ञिक क्षेत्रको मर्यादालाई नै ध्वस्त पार्ने गरी कार्कीले चालिरहेका कदमको आफूहरुले निरन्तर प्रतिरोध गरिरहने जानकारी गराएका थिए ।

प्रतिकृया दिनुहोस