चिकित्साशास्त्र अध्ययनरत विद्यार्थीहरुको संस्था नेपाल मेडिकल स्टुडेन्ट्स सोसाइटीले डा केसीको आन्दोलनमा नेता मनमोहन अधिकारीको नाम असान्दर्भिक तरिकाले जोडेर गलत प्रचार भइरहेको भन्दै ध्यानाकर्षण गराएको छ ।

डा केसीका मागप्रति ऐक्यवद्धता जनाउँदै आन्दोलनमा होमिएको सोसाइटीले मनमोहन अधिकारीको नाममा कुनै संस्था खोल्नुमा सोसाइटी र स्वयम् डा केसीको पनि कुनै आपत्ति नभएको भन्दै उनका नाममा महाराजगञ्ज मेडिकल क्याम्पसलाई ‘मनमोहन महाराजगञ्ज मेडिकल क्याम्पस’ नाम राखिएमा पनि सोसाइटी गौरवान्वित हुने जनाएको छ ।

“श्रद्धेय मनमोहन अधिकारी एमाले नेतामात्रै नभएर राजनेता हुनुहुन्थ्यो र उहाँजस्तो सम्माननीय व्यक्तिको नाममा संस्था खोलिनुमा डा केसीको आपत्ति नभएको र जसरी प्रचार गरिएको छ त्यो पूर्णतया गलत हो,” विज्ञप्तिमा भनिएको छ, “नामसँग हामीलाई र प्राडा केसीलाई न कुनै आपत्ति छ न कहिल्यै हुनेछ । अतः अनावश्यक राजनीतिकरण गरेर प्राडा केसीलाई अवाञ्छित लान्छना लगाइएका प्रति खेद प्रकट गर्दै चिकित्सा क्षेत्र सुधार अभियानमा निस्वार्थ भएर सहयोग गर्न हुन सम्बन्धित सबैलाई आह्वान गर्दछौं ।”

प्रतिकृया दिनुहोस