नुवाकोटको तारुकाबासीको तारतम्यमा आयोजना हुने गोरु जात्रा भने गाई जात्राभन्दा फरक सन्दर्भमा हुन लागेको हो । १९ माघदेखि दुई दिन काठमाडौंको ज्ञानेश्वरमा हुने गोरु जात्रामा गोरु जुधाई प्रतियोगिता हुने भएको हो । जात्रामा तारुकामा छानिएका उत्कृष्ट र बलिया गोरु जुधाएर राजधानीबासीले मनोरञ्जन गर्नेछन् ।

सानो गौचरमा हुने प्रतियोगितामा आवश्यक गोरु छनोटका लागि तारुकामा १ पुसमा गोरु सम्मेलन नै गर्न लागिएको तारुका माघेसंक्रान्ति मेला व्यवस्थापन समितिका अध्यक्ष जनकराज ढुङ्गानाले बताए । नेपाल ओलम्पिक सङ्ग्रहालयको आयोजनामा तारुकाका गोरुहरु ज्ञानेश्वरको सानो गौचरणमा जुधाउने उनले जानकारी दिए । ‘प्रथम राष्ट्रिय गोरु जुधाइ प्रतियोगिता’ नाम दिइएको यस मेलामा चार हल गोरु जुधाइने छ ।

ढुङ्गानाका अनुसार विजेता गोरुधनीले रु २५ हजार नगदसहित प्रशंसापत्र एवम् उपविजेताले रु १५ हजार नगदसहित प्रशंसापत्र पाउने छन् । प्रतियोगितामा जुधाउने गोरुको बिमा तथा औषधोपचार गर्ने पनि सम्झौता भएको छ ।

तारुका–५ चन्दनी र बेत्रावतीमा हरेक वर्ष माघे संक्रान्तिका अवसरमा गोरुजुधाइ मेला हुँदै आएको छ ।

प्रतिकृया दिनुहोस