७ पुस रातिमात्रै माडी कल्याणपुर– ६ हरिनगरमा हात्तीले पाँच घर भत्काएको माडी प्रहरीले जानकारी दिएको छ । हात्तीले स्थानीय बलराम राउत, चन्द्र राउत, सोना राउत, धर्मेन्द्र महतो र रूप्लाल चौधरीको घर भत्काएको स्थानीयवासी सन्तोष पनेरुले जानकारी दिए । उनका अनुसार सुतिरहेका बेला निकुञ्जबाट आएको हात्तीले एक्कासि घर भत्काउन थालेपछि स्थानीयवासीले भागेर ज्यान जोगाएका थिए । हात्ती आक्रमणबाट कति क्षति भयो भत्रेबारेमा अहिले तथ्याङ्क लिने काम भइरहेको प्रहरीले जनाएको छ ।

माडीको द्रौपदीनगरमा एक दम्पतीको ज्यान लिएको हप्ता दिन बित्न नपाउँदै पुनः हात्ती आक्रमण दोहोरिएपछि यहाँको जनजीवन त्रसित भएको छ । चितवनमा विगतदेखि आतङ्क मच्चाउँदै आएको हिंस्रक जङ्गली हात्ती ध्रुवेले नै घरमा आक्रमण गरेको पीडितहरूले बताएका छन् ।

यता चितवन निकुञ्जले शुक्रबार रातिदेखि उक्त हात्ती सम्पर्कविहीन भएको र खोजी जारी रहेको बताएको छ । अहिलेपनि टोली हात्तीको खोजीमै लागेको निकुञ्जका प्रमुख झमकबहादुर कार्कीले जानकारी दिए । दुई दिनदेखि सो हात्ती चितवनको सुकेभार छाडेर माडी क्षेत्रतर्फ लागेको निकुञ्जले बताएकै बेला आक्रमण हुनुले सोही हात्ती गएको हुनसक्ने निकुञ्जले पनि आशङ्का गरेको छ ।

हात्ती नियन्त्रणमा नआउँदा यहाँका स्थानीयवासी त्रासमा रात बिताउन बाध्य भएका छन् । रासस

प्रतिकृया दिनुहोस