अबको एक हप्तासम्म पनि सहमति नभए वैशाखमा चुनाव हुन नसक्ने भन्दै कांग्रेस नेता केसीले मुलुकमा मुठभेडको स्थिति सिर्जना हुनलागेको दाबी गरेका छन् । नेपाल प्रेस युनियनले १२ पुस बिहान इलाममा आयोजना गरेको पत्रकार भेटघाटमा नेता केसीले संविधानसभाको पुनःस्थापना, वर्तमान सरकारमा नेपाली काँग्रेसको सहभागिता र संविधानको अन्तरवस्तुमा गर्ने भनिएको सहमतिमा नेपाली काँग्रेसले सहमति नगर्ने प्रस्ट पारे ।

“काँग्रेस सत्ताको निम्ति पार्टीलाई बन्धकी राखेर सरकारमा जाँदैन, बरु गठबन्धन बाहिरबाट कसको नेतृत्वमा जान सकिन्छ त्यसबारे भने छलफल गर्न सकिन्छ” उनले भने । एकीकृत नेकपा माओवादीका कारण देशमा राजनीतिक र संवैधानिक शून्यता आएको भन्दै केसीले चार वर्षसम्म संविधानसभामा नभएको सहमति चार दिनमा गर्नुपर्छ भन्ने माओवादीको भनाइ सत्ता टिकाउने खेल मात्र भएको टिप्पणी गरे ।

निष्पक्ष र भयरहित निर्वाचनको लागि नेपाली काँग्रेसको नेतृत्वमा राष्ट्रिय सरकार अहिलेको आवश्यकता रहेको उनले जिकिर गर्नुभयो । उनले थपे, “नेपाली कांग्रेस वर्तमान सरकारको नेतृत्वमा एक दिन त के एक सेकेन्डका लागि पनि जाँदैन ।” एक हप्तासम्म पनि सहमति नभए आन्दोलनबाट वर्तमान सरकारलाई पाखा लगाउने केसीले चेतावनी दिए ।

अध्यक्ष पुष्पकमल दाहालले सहमतिका लागि हदैसम्मको लचकता जस्तो देखाउने र बाबुराम भट्टराईले विभिन्न बहाना झिक्ने, यी सबै सत्ता टिकाउने खेल मात्र भएको उनको भनाइ थियो ।

प्रतिकृया दिनुहोस