स्पेनी क्लब रियल मेड्रिडका क्रिस्चियानो रोनाल्डो र आफू खेलिरहकै क्लब बार्सिलोनाका सहयात्री आन्द्रेस इनियस्टालाई पछि पार्दै हिजो चौथो पटक ‘फिफा बेलोन डी अर’ पुरस्कार हात पारेपछि मेसीलाई महान खेलाडी मानिएको हो । यसअघि ब्राजिलका पेले र अर्जेन्टिनाकै डियगो म्याराडोनालाई सर्वकालीन महान फुटबलर मानिन्थ्यो ।

अन्तर्राष्ट्रिय फुलटबल महासंघ (फिफा) ले प्रत्येक वर्ष उत्कृष्ट खेलाडीलाई प्रदान गर्ने यो पुरस्कार यसअघि कसैले पनि तीन पटकभन्दा बढी जितेका छैनन् । तीन पटक यो पुरस्कार पाउने अन्य खेलाडीमा फ्रान्सका मिचेल प्लाटिनी, नेदरल्याण्डका जोहान क्रुफ, ब्राजिलका रोनाल्डो र फ्रान्सका जिनेदिन जिदान हुन् । पेले र म्याराडोनाले विश्व फुटबलमा तहल्का मच्चाएको भए पनि गोल र पुरस्कारको कीर्तिमानमा उनीहरुलाई मेसीले पछाडि पारेका छन् ।

क्लब फुटबलमा कीर्तिमान बनाउँदै व्यक्तिगतरुपमा उत्कृष्ट फुटबलर कहलिए पनि देशका लागि भने ठूलो सफलता हात नपारेका कारण मेसीलाई पेले र म्याराडोना बराबर महान खेलाडी मानिनु हुँदैन भन्नेहरु पनि नभएका होइनन् । पेलेले आफ्नो देश ब्राजिललाई तीन पटक तथा म्याराडोनाले अर्जेन्टिनालाई एक पटक विश्वकप जिताएका थिए । तर, मेसीले अर्जेन्टिनालाई विश्वकप जिताउन सकेका छैनन् ।

क्लब फुटबलमा भने मेसीले अनेकौं कीर्तिमान कायम गरेका छन् । एक वर्षमा सबैभन्दा धेरै ९१ गोल गरेका उनले एकै सिजनमा धेरै गोल (६८) को कीर्तिमान पनि रचेका छन् । स्पेनी फुटबल लिग ‘ला लिगा’ मा एक सिजनमा धेरै (५०) गोल गरेका तथा ला लिगाको एकै सिजनमा ८ पटक ह्याट्रिक गरेका छन् । उनले ला लिगामा जम्मा १५ ह्याट्रिक पूरा गरेका छन् ।

भर्खरै २५ वर्ष पुगेका मेसीले देखाएको यो चमत्कारका कारण कतिपय फुटबल पण्डितहरुले अहिलेको फुटबल युगलाई ‘मेसी युग’ सम्म भन्न थालेका छन् ।

तस्बीरहरुः एपी

प्रतिकृया दिनुहोस