अब स्वतन्त्र व्यक्तिको नेतृत्व : एनेकपा माओवादीका अध्यक्ष पुष्पकमल दाहालले २५ पुसमा हेटौँडामा स्वतन्त्र व्यक्तिको नेतृत्वमा सहमतीय सरकारको सम्भाबना बढेको बताएका छन् । तस्बीर: अशोक सुजन श्रेष्ठ/हेटौंडा

क्रान्तिकारी पत्रकार संघ मकवानपुरद्वारा २५ पुसमा हेटौंडामा आयोजित पत्रकार सम्मेलनमा बोल्दै दाहालले अहिलेको अवस्थामा स्वतन्त्र प्रधानमन्त्रीको सम्भावना सबैभन्दा माथि रहेको बताए । उनले प्रधानमन्त्री डा. बाबुराम भट्टराईकै नेतृत्वमा राष्ट्रिय सरकार बन्ने सम्भावना पनि बढेको दाबी गरे । त्यसैगरी अन्य पार्टीका नेताको नेतृत्वमा सरकार गठन हुने सम्भावना यथावत् रहेको जिकीर गरेका थिए ।

२६ पुसमा प्रमुख चार दलसहित अन्य दलको बैठकले तीन विकल्पमध्ये एउटामा सहमती गरी चुनावमा जाने वातावरण बन्ने सम्भावना रहेको पनि उनले बताए । २५ पुसमा राष्ट्रपतीसँग भेटमा २६ पुस दिउँसै प्रमुख दललाई बोलाएर राष्ट्रपतीले छलफल गर्ने सहमति भएको खुलासा पनि गरे । सरकार पक्षीय गठबन्धनको निर्णयअनुसार संविधानसभा पुनस्र्थापनाको प्रस्ताव अन्तिम अस्त्रको रुपमा प्रयोग गर्ने उनको भनाइ थियो ।

दैलेखका पत्रकार डेकेन्द्रराज थापा हत्या अभियोगसम्बन्धी सञ्चारकर्मीको जिज्ञासामा उनले विस्तृत शान्ति सम्झौता अनुसार सत्य निरुपण आयोगले छानबिन गरी दोषी देखाइएकालाई मात्र कार्बाही गर्नुपर्ने बताए । उनले भने, “कसैमाथि कार्बाही गर्ने प्रक्रिया चल्यो भने वेलगाम तरिकाले जान्छ र झन् अराजक स्थिति बन्न सक्छ ।” शान्ति सम्झौतामा बनाएको मार्ग भन्दा बाहिर गएर गर्न खोजियो भने न्याय दिने भन्दा पनि बिथोलिने उनको भनाइ थियो ।
कार्यक्रमअघि उनले २० माघदेखि हुने एमाओवादीको राष्ट्रिय महाधिवेशन स्थल हेटौँडा कपडा उद्योग परिसरको अबलोकन गरेका थिए ।

–अशोक सुजन श्रेष्ठ, हेटौंडा

प्रतिकृया दिनुहोस