२६ पुस दिउँसो राष्ट्रपति डा रामवरण यादवलाई भेट्न शीतलनिवास पुगेका नेताहरुले पुस मसान्तसम्म सहमतिको सरकार गठन गर्ने भन्दै सहमतिका लागि पछिल्लो पटक आफूहरुले गरेका प्रयासका बारेमा पनि राष्ट्रपतिलाई जानकारी गराएका थिए ।

बैठकपछि सञ्चारकर्मीहरुसग कुरा गर्दै एकीकृत नेकपा माओवादीका अध्यक्ष पुष्पकमल दाहालले सहमतिका लागि राष्ट्रपतिले पुन म्याद थप्नुपर्ने बताए । नेकपा एमालेका वरिष्ठ नेता माधवकुमार नेपालले पटक पटक दिएको समयमा पनि दलहरुले सहमति गर्न नसकेका कारण राष्ट्रपतिले सहमतिका लागि नया प्रक्रिया शुरु गर्नुपर्ने बताए । उनले एकीकृत नेकपा माओवादी र वर्तमान सरकारका कारण सहमतीय सरकार गठनका लागि दिएको समय खेर गएकाले निकासका लागि राष्ट्रपतिले नया“ कदम चाल्नुपर्नेमा जोडदिए । एमाले अध्यक्ष झलनाथ खनालले सहमतिका लागि पुस मसान्तसम्म अधिकतम प्रयास गर्ने बताए । उनले भने, “उत्तरायण सकिएर दक्षिणयन लाग्नु अगाडि नै सहमति हुन्छ ।” कांग्रेस उपसभापति रामचन्द्र पौडेलले दलहरुबीच पुस मसान्तसम्म सहमति जुट्नु आवश्यक रहेको बताए ।

बैठकमा एकीकृत नेकपा माओवादी अध्यक्ष दाहाल, नेता अमिक शेरचन, नेपाली कांग्रेसका सभापति सुशील कोइराला, उपसभापति रामचन्द्र पौडेल, वरिष्ठ नेता शेरबहादुर देउवा, नेकपा एमालेका अध्यक्ष झलनाथ खनाल, वरिष्ठ नेता नेपाल र मधेशी मोर्चाका संयोजक विजयकुमार गच्छदार सहभागी थिए ।

प्रमुख दलका नेताहरुसँगको छलफलपछि २७ पुसमा राष्ट्रपति डा यादवले विघटित संविधान सभामा प्रतिनिधित्व गर्ने सबै दलका नेताहरुसँग छलफल गर्ने कार्यक्रम रहेको शीतलनिवास स्रोतले बताएको छ । म्याद थपको शृंखला लगातार चलिरहने र दलहरुबीच सहमति नहुने अवस्था जारी रहेकाले  विपक्षी दलहरु राष्ट्रपतिले यो प्रक्रियालाई अन्त्य गरी नयाँ प्रधानमन्त्रीको घोषणा गर्नुपर्ने बताउँदै आएका छन् ।

प्रतिकृया दिनुहोस