पार्टीको तुलव्यानर र झण्डा सहित सडक अवरुद्ध गरेर बसेका एमाओवादीका कार्यकर्ताहरुले कोशी राजमार्गको धरान–धनकुटा सडकखण्डमा संचालन हुने निजी तथा सार्वजनिक यातायातका साधनहरुबाट चन्दा असुली गरेका छन् ।

उनीहरुले धनकुटा नगरपालिका–७ जिरोप्वाईन्टस्थित ट्राफिक चोकमा विहानदेखि चन्दा संकलन शुरु गरेको भएपनि ट्राफिक प्रहरीले नउठाउन आग्रह गरेपछि पुनः धनकुटा नगरपालिका वडा नं. ६ स्थित फोक्लेनटापमा गएर रकम असुली गरिरहेको जिल्ला ट्राफिक प्रहरी कार्यालयका प्रमुख शिवकुमार शर्माले बताए । आफैं राज्यसत्ता संचालन गरिरहेको पार्टीका कार्यकर्ताले कानूनको ठाडो उल्लंघन गर्दै रकम असुल्नु पूर्णरुपमा गैरजिम्मेवार र लज्जास्पद कार्य भएको प्रमुख जिल्ला अधिकारी खड्गबहादुर चापागाईले बताए । उनले सो घटनाको जानकारी भए लगत्तै राजमार्गमा तुलव्यानर टाँगेर चन्दा असुली गर्ने कार्य बन्द गर्नको लागि मातहतका सुरक्षाकर्मीहरुलाई निर्देशन दिईसकिएको र सो पार्टीका जिल्ला संयोजक हेमराज भण्डारीलाई समेत चन्दा असुली बन्द गर्न आग्रह गरेको बताए ।

महाधिवेशन सम्पन्न गर्नका लागि गठित आर्थिक समितिका संयोजक सुन्दरबाबु श्रेष्ठले राजमार्गमा व्यानर राखेर चन्दा संकलन गरिरहेको स्वीकार गरेका छन् । उनले धनकुटा नगरपालिका–६ स्थित फोक्लेनटापुमा आफ्नो नेतृत्वमा व्यानर राखेर सो राजमार्गमा संचालन हुने सवारी साधनहरुबाट रकम संकलन गरिरहेको बताए । तर कसैलाई दुव्र्यावहार तथा जबरजस्ती नगरिएको पनि उनले बताए । उनले १४ माघमा धनकुटा बजारमा व्यानर सहित स्वेच्छिक चन्दा संकलन गरिने पनि जानकारी दिए ।

सन्तोष रुचाल, धनकुटा

प्रतिकृया दिनुहोस