गुरु कृष्णप्रसादलाई बोकेर विद्यालय लैजाँदै विद्यार्थीहरु ।

२०२८ सालमा अर्घाखाँचीको ठूलापोखरामा भगवती निम्न माध्यमिक विद्यालय स्थापना गरेर पढाउन शुरु गरेका शारिरिक रुपमा अशक्त शिक्षक कृष्णप्रसाद पौडेललाई विद्यार्थीहरुले घरबाटै बोकेर ल्याउने र कक्षा सकिएपछि घरमै पुर्‍याइदिने गरेका छन् ।

५८ वर्षीय पौडेललाई ११ वर्षको हुँदा नसासम्बन्धी रोग लागेपछि शरिर सुक्दै गयो । उनको कम्मर मुन्तिरको भाग चल्दैन । तर पनि ०२८ सालमा आफैंले स्थापना गरेको र ०४० सालमा स्वीकृति पाएको विद्यालयमा उनले पढाइरहेका छन् । १२ किलो तौलका उनलाई निमाविका विद्यार्थीले सजिलै उचाल्न सक्ने भएकाले बिद्यालयदेखि करिब ५० मिटर पर रहेको घर आउजाउ गर्न अप्ठ्यारो छैन ।

गाविसभरि नै गुरु भनेर चिनिने पौडेलले शुरुको १७ वर्षसम्म पढाए वापत पाउने पारिश्रमिक अभिभावकहरुले मानापाथी जम्मा गरी दिने अन्नमात्रै थियो । २०४५ सालदेखि ५ सय रुपैयाँ मासिक तलब पाउन थालेका गुरुको अहिलेको तलब मासिक १८ सय रुपैयाँ पुगेको छ । तलबले गर्जो टार्न  नपुग्ने भए पनि आफुले पढाएका बिद्यार्थीहरु डाक्टर, इञ्जिनियर, हाकिम भएको देख्दा भने गुरु खुशी हुन्छन् ।

उनका नाममा पूर्व विद्यार्थीहरुले कृष्ण प्रसाद पौडेल अक्षय कोष स्थापना गरिदिएको र पञ्चेबाजा सहित दोसल्ला ओढाएर सम्मान गरेको दिन उनको जीवनको सबैभन्दा खुशीको दिन थियो ।
प्रेमनारायण आचार्य, अर्घाखाँची

प्रतिकृया दिनुहोस