नागरिक लगानी कोष र माथिल्लो तामाकोशी हाइड्रोपावर कम्पनीबीच २३ माघमा शेयर निष्काशनसम्बन्धी सम्झौता भएको हो । कम्पनीले कर्मचारी सञ्चय कोषका सञ्चयकर्ता, दोलखावासी, ऋण दिने सरकारी संस्था, नेपाल विद्युत् प्राधिकरण तथा माथिल्लो तामाकोसी हाइड्रोपावर कम्पनीका कर्मचारी र सर्वसाधारणका लागि साधारण शेयर निष्काशन गर्ने भएको हो ।

साधारण शेयर मध्ये रु. ३ अर्ब ६० करोड ६ लाख भने यो वर्षभित्रै निष्काशन गर्ने आयोजनाले जनाएको छ । आयोजनाका प्रमुख विज्ञानप्रसाद श्रेष्ठले कम्पनी र कोषबीच २१ मंसिर २०६७ मा भएको ऋण सम्झौताको आधारमा कोषलाई शेयर निष्काशन तथा बिक्री प्रबन्धको जिम्मा दिएको जानकारी दिए ।

कम्पनीको संस्थापक शेयरको रुपमा भने नेपाल विद्युत् प्राधिकरण, नेपाल टेलिकम, राष्ट्रिय बीमा संस्थान तथा नागरिक लगानी कोष छन् । उनीहरुबाट रु. ५ अर्ब ४० करोडमध्ये ५ अर्ब १० करोड प्राप्त भैसकेको र बाँकी ३० करोड शेयर निष्कासन गर्नुअघि प्राप्त हुने श्रेष्ठले उल्लेख गरे ।

२०७२ जेठदेखि विद्युत् उत्पादन थाल्ने लक्ष्य रहेको माथिल्लो तामाकोसी दोलखाको लामाबगरमा निर्माणधीन अवस्थामा छ । तामाकोसीको कुल लागत भने रु. ३५ अर्ब २९ करोड, अधिकृत पूँजी ११ अर्ब र जारी पूँजी १० अर्ब ५९ करोड छ ।

प्रतिकृया दिनुहोस