थप समाचारबुधबार, माघ २४, २०६९
मलाला फेरि बलिदानीका लागि तयार
पाकिस्तानको चरमपन्थी बाहुल्य क्षेत्र स्वातकी मलालाले जीवन र मृत्युको दोसाँधमा चार महिना विताएपछि जारी गरेको आफ्नो पहिलो सन्देशमा पाकिस्तानमा शान्ति र शिक्षाको विकासका लागि हरेक जरुरी काम गर्न आफू तयार रहेको बताएकी छन् ।
मलालाले हालै एक भिडियो सन्देश जारी गर्दै भनेकी छन, “म बोल्न सक्छु, देख्न सक्छु र दिनदिनै निको हुँदैछु, यो धेरै मानिसहरुको प्रार्थनाको परिणाम हो ।” उनको यो भिडियो सन्देशमा विश्वभरीबाट उनलाई आएका सन्देश, शुभकामना र प्रार्थना पत्रका खात देखिन्छ ।
मलालाले भिडियो सन्देश पहिले अंग्रेजी फेरि उर्दु र त्यसपछि पश्तो भाषामा दिएकी छन् । “हाम्रो देशमा र पुरै विश्वमा शान्ति स्थापना होस र हेरक बच्चाले पढ्न पाउन र म शान्तिका लागि बलिदानी दिन तयार छु, ” सन्देशमा उनले भनेकी छन्, “म मानिसहरुको सेवा गर्न चाहन्छु, हरेक बालबालिकाले शिक्षा पाउन भन्ने मेरो चाहना हो । यस उद्देश्यका लाग मैले मलाला कोष स्थापना गरेकी छु ।” मलाला कोषले बालिका शिक्षाका लागि विशेष प्रयास गर्ने र राम्रा विद्यालय स्थापना गर्ने उनले बताएकी छन् ।
१५ वर्षकी मलालालाई चरमपन्थी तालिवानीले पाकिस्तानको स्वात क्षेत्रमा विद्यालयबाट फर्कंदै गर्दा चार महिनाअघि टाउकोमा गोली प्रहार गरेका थिए । भाग्यबास उनी बाँचिन, अहिले उनको बेलायतमा उपचार भइरहेको छ ।
मलालाले ११ वर्षको उमेरदेखि नै बीबीसीमा ब्लग लेखेर चर्चा पाएकी थिइन् । उनले पाकिस्तानमा बालिका शिक्षाका लागि अभियान नै चलाएकी थिइन् ।