११ जेठ दिउसो आएको सर्वोच्च अदालतको फैसलापछि १४ जेठ भित्रै संविधान जारी गर्नुको विकल्प नभएको माओवादी अध्यक्ष पुष्पकमल दाहाल ‘प्रचण्ड’ले बताएका छन् । ११ जेठ बेलुकी ८ बजे सभामुख सुवास नेम्बाङसँगको भेटमा ‘प्रचण्ड’ले उक्त कुरा बताएको बुझिएको छ ।

हिमालखबर सँगको कुराकानीमा सभामुख नेम्बाङले भेटघाट भएको बताउँदै अध्यक्ष दाहाल १४ जेठ भित्रै संविधान जारी गर्न सकरात्मक रहेको पाएको बताएका छन् । सभामुखले भने ‘उहाँले सहमतीकै आधारमा संविधान जारी गर्नुको विकल्प नभएको बताउनु भएको छ ।’ प्रचण्डले सभामुखलाई राजनीतिक सहमतिबाटै संविधान जारी गरिने भएकाले अन्य (मतदान) लगायतका प्रकृयालाई अघि बढाउनु नपर्ने समेत बताएको बुझिएको छ । दाहाल नेम्बाङ भेटघाटबारे व्रिफिंग प्राप्त एक उच्च राजनीतिक स्रोतका अनुसार प्रचण्डले सभामुखलाई भोली दिउँसोसम्म चित्त बुझ्दो अवस्था निर्माण भइसक्ने बताएका थिए ।

त्यसैगरी प्रधानमन्त्री भट्टराईले पनि सभामुखसँगको टेलिफोन वार्तामा सर्वोच्चको फैसला पश्चात १४ जेठ भित्रै संविधान जारी गर्न आफू लागी पर्ने बताएका थिए । प्रधानमन्त्री आफु पनि गम्भीर भएर लागेको र १२ जेठ बिहानदेखी बेलुकीसम्ममा बृहत छलपल गरेर सहमतीमा पुग्ने कुरामा बताएको उक्त स्रोतको दाबी छ ।

यसैबीच बालुवाटारस्थित एक उच्च श्रोतका अनुसार १४ जेठ बेलुकीसम्म सहमतीकै संविधान ल्याउनमा प्रयासरत रहने र सहमती हुन नसकेको अवस्थामा मात्र संकटकाल लगायतका अन्य विकल्पबारे सोच्न सकिने प्रधानमन्त्रीले आफ्ना निकटस्थहरुसँग बताएको बुझिएको छ । यद्यपी सो अवस्था आउनु अघि नै सहमति भइसक्नेमा आफू समेत विश्वस्त रहेको स्रोतको दावी छ ।

प्रतिकृया दिनुहोस