व्यक्तित्वबुधबार, बैशाख ११, २०७०

सराहनीय उडान

हिमालखबर

बुद्ध एअरका प्रमुख वीरेन्द्रबहादुर बस्नेत, जमिन धितो राखेर ३६ प्रतिशत व्याजमा रु.३६ लाख ऋण लिएर शुरू भएको यो कम्पनीको सम्पत्ति अहिले रु.८ अर्बभन्दा धेरै पुगेको छ भने वार्षिक कारोबार मात्रै रु.४ अर्ब छ । उसले ७५० जनालाई प्रत्यक्ष रोजगारी पनि दिएको छ । तस्बीरः विक्रम राई/हिमालखबर

२५ असोज २०५४ मा १८ सीटे एउटा ‘बी १९०० डी’ जहाजबाट उडान सेवा शुरू गरेको बुद्ध एअरसँग अहिले तीन वटा १६ सीटे, तीन वटा ४२ सीटे र तीन वटा नै ७२ सीटे गरी ९ जहाज छन् । जमिन धितो राखेर ३६ प्रतिशत व्याजमा रु.३६ लाख ऋण लिएर शुरू भएको यो कम्पनीको सम्पत्ति अहिले रु.८ अर्बभन्दा धेरै पुगेको छ भने वार्षिक कारोबार मात्रै रु.४ अर्ब छ । उसले ७५० जनालाई प्रत्यक्ष रोजगारी पनि दिएको छ ।

निजी क्षेत्रबाट नेपाली हवाई सेवा क्षेत्रलाई डेढ दशकमै यो आकारमा फैलाउन सफल बुद्ध एअरका प्रमुख वीरेन्द्रबहादुर बस्नेत (४८) का उपलब्धि अरू पनि धेरै छन् । मोरङमा जन्मेका उनले गृहजिल्लासहित सुनसरी र झपाको कृषिमा यान्त्रिकीकरण अभियान चलाएका छन्, जसमा १० हजार बिघा जमिन जोत्ने किसानहरूको ५० सहकारी २०७० सम्ममा सहभागी हुनेछन् । उनको त्यो अभियानले ती जिल्लामा चुपचाप कृषि क्रान्ति नै चलाएको मानिएको छ ।

पूर्व मन्त्री सुरेन्द्रबहादुर बस्नेतका छोरा वीरेन्द्रको बुबामा जस्तै कृषिमा रुचि थियो । त्यही भएर भारतको बनारसमा अध्ययन गर्दा उनले कलकत्ता गएर माछाका भुरा उत्पादन सम्बन्धी तालीम पनि लिए । बुबा चाहिं २०४२ को त्यो बेला मोरङको डागीहाटमा आधुनिक प्रविधि अपनाएर खेती गर्दैथिए । भारतबाट फर्केपछि वीरेन्द्र पनि माछा खेतीमा लागे । जुन बेला उनले ५६ पोखरी खनेर वर्षमा ६० लाख भुरा बिक्री गरे ।

स्नातकोत्तर पढ्न काठमाडौं आएपछि भने उनी गाउँ फर्केनन् । त्यसपछि लामो व्यावसायिक फड्को हानेका वीरेन्द्र भन्छन्, “चुस्त व्यवस्थापन, कडा मिहिनेत र धैर्यले म र बुद्ध एअरलाई यहाँसम्म पुरयाएको हो ।” २०४६ को राजनीतिक परिवर्तनपछि नियन्त्रित ‘लाइसेन्स सिस्टम’ र ब्याङ्किङ असुविधा हटेर व्यवसाय गर्न सहज भए पनि राजनीतिक अस्थिरता बाँकी रहँदा निजी क्षेत्रले क्षमता अनुसार प्रगति गर्न नसकेको बताउने वीरेन्द्र भन्छन्, “चुनाव हुने र राजनीतिक अस्थिरता समाप्त हुने हो भने बुद्ध एअरले छिट्टै अन्तर्राष्ट्रिय उडान पनि शुरू गर्नेछ ।”

-डम्बरकृष्ण श्रेष्ठ

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...