प्रा. डा. उषा ठाकुरद्वारा लिखित उक्त काव्यसाधनाको नेपालका लागि भारतीय राजदूत जयन्तप्रसाद, नेपाल प्रज्ञा–प्रतिष्ठानका कुलपति वैरागी काइँला, युगकवि सिद्धिचरण प्रतिष्ठानका अध्यक्ष मोदनाथ प्रश्रित, प्रतिष्ठानका संरक्षण एवम् युगकवि श्रेष्ठका छोरा रविचरण, कवि दुर्गालाल श्रेष्ठ, प्रा डा मोहनप्रसाद लोहनी र लेखिका ठाकुरले १० असारमा संयुक्त रुपमा विमोचन गरेका हुन । नेपाल प्रज्ञा–प्रतिष्ठानका कुलपति काइँलाले कृति प्रकाशनले नेपाल र भारतका साहित्यकारलाई नजिक ल्याउने विश्वास व्यक्त गरे ।

नेपालका लागि भारतीय राजदूतले कृति नेपाल र भारतका साहित्यप्रेमीलाई एक सूत्रमा जोड्ने महत्वपूर्ण काव्य रहेको बताए । नेकपा मालेका महासचिव सिपी मैनालीले युगकवि सिद्धिचरण प्रकृतिप्रेमी तथा क्रान्ति र चेतनालाई अघि सार्ने कवि भएको धारणा राखे ।

अनुवादक ठाकुरले नेपाली र भारतीय साहित्यकारबीच एक अर्काप्रति सामीप्यता ल्याउने प्रयासस्वरुप कृति अनुवाद गरिएको उल्लेख गरे । युगकवि सिद्धिचरण स्वर्ण शताब्दी वर्षका अध्यक्ष प्रश्रितले युगकविले नयाँ युगका लागि निर्भीकताका साथ निरङ्कुश राणा शासनका बेला पनि साहित्यमार्फत जनताका पक्षमा कलम चलाएको बताए ।

बिपी कोइराला भारत–नेपाल प्रतिष्ठान र भारतीय राजदूतावास काठमाडौँद्वारा प्रकाशित काव्यसाधनामा युगकवि सिद्धिचरणको व्यक्तित्व र जीवनी, कविको काव्य रचनाका कालक्रमिक विवरण, काव्यमा स्वच्छन्दतावाद, लोकचेतनालगायतबारेमा प्रकाश पारिएको छ ।

काव्यसभाका रुपमा भएको कार्यक्रममा कवि श्यामदास वैष्णव, तेजेश्वरबाबु ग्वंगः, युयुत्सु आरडी शर्मा, भुवनहरि सिग्देल, राजेन्द्र थापा, देवी नेपाल, बलराम दाहाल, रुपक अलङ्कार, ज्ञानु विद्रोही, रत्न विरही घिमिरे, सरोज घिमिरे, जीत कार्की, भारतीय दूतावासका प्रथम सचिव अभयकुमारलगायतले युगकवि सिद्धिचरण विषयमा कविता वाचन गरेका थिए ।

प्रतिकृया दिनुहोस