नीलहीरा समाजले संविधानसभाको चुनावमा उम्मेदवारी दिने घोषणा गर्नुको कारण के हो ?

लैंगिक अल्पसंख्यकको सवाल सामाजिक बहसको मुद्दा हो । हाम्रा मुद्दा अरुले सशक्त रुपमा उठाउन नसक्ने भएकाले चुनावमा उठ्ने घोषणा गरेका हौं । एक–दुई जनाले मात्र मुद्दा उठाउँदा कम प्रभाव हुने भएकाले धेरैले उम्मेदवारी दिन लागेका हौं ।

दलहरुले टिकट दिएनन् भने के गर्नुहुन्छ ?

उहाँहरु समावेशी सहभागिताका पक्षमा हुनुहुन्छ । हामीले संख्या नै तोकेर उम्मेदवारी दिने घोषणा गरेकाले अब दलहरुले हामीलाई उम्मेदवार बनाउलान् भन्ने आशा छ । हाम्रा कतिपय साथी पहिले नै विभिन्न दलसँग आवद्ध रहेकाले टिकट पाउने समस्या नपर्ला भन्ने लाग्छ । टिकट नपाए स्वतन्त्र उम्मेदवारी दिन्छौं ।

चुनावमा मत पाउने र जित्ने आशा छ ?

प्रत्यक्ष चुनावबाट जित्न अलि गाह्रै छ । किनभने, जनमत निर्माण गर्नु त्यति सहज छैन । हाम्रो आशा पार्टीहरुले समानुपातिकबाटै संविधानसभामा लैजान्छन् भन्ने हो । त्यसो नभए पनि शक्ति परीक्षण गर्न चुनावमा उठ्छौं ।

चुनावमा तपाईंहरुका मुद्दा के हुनेछन् ?

हाम्रो समुदायको बारेमा बढी संवेदनशील हुन्छौं नै । तर, समग्रमा हाम्रा मुद्दा पनि अरु उम्मेदवारका जस्तै हुनेछन् । नेपाली जनताका लागि शान्तिसुरक्षा, विकास र गरीबी हाम्रा पनि मुद्दा हुनेछन् ।

गत संविधानसभामा तपाईंहरुको प्रतिनिधि सुनिलबाबु पन्तको भूमिका कस्तो रह्यो ?

संविधान बन्न नसके पनि उहाँको भूमिका निकै राम्रो रह्यो । तर, ६०१ जनामा हाम्रा आवाज राख्ने उहाँ एक्लो हुनुभयो । त्यही भएर सामूहिक उम्मेदवारी दिन लागेका हौं ।

२३ असारको साप्ताहिक खबरपत्रिका हिमालबाट

प्रतिकृया दिनुहोस