अर्थ/बजारशुक्रबार, साउन ११, २०७०
माथिल्लो मर्स्याङदीको निर्माण कार्य सुचारु
आयोजनाका लागि सवै खालको सुरक्षा स्थानीय प्रशासनले दिने र तोडफोड घटनाका दोषीहरुलाई कारबाही गर्ने स्थानीय राजनीतिक दल र स्थानीय प्रशासनले प्रतिवद्धता जाहेर गरेपछि चार दिनदेखि बन्द माथिल्लो मस्र्याङदी आयोजनामा निर्माणकार्य सुचारु भएको छ ।
“दल, प्रशासन र आयोजनाबीच पटक पटक भएको बैठकको क्रममा सुरक्षाको प्रत्याभूति गराउने र दोषीहरुलाई कारबाही गर्न अनुसन्धान गर्ने भएपछि आयोजना संचालनमा ल्याउने निर्णय गरेका हौँ,” आयोजनाका जनसम्पर्क अधिकृत अर्जुन गुरुङले भने ।
एक हप्ताअघि स्थानीय ६ बर्षीया बालिका आकाँक्षा तामाङको खोलामा बगेर मृत्यु भएपछि स्थानीयबासीले आयोजनाले खोलामा पुल नबनाएकाले बालिका खोलामा बगेको भन्दै आयोजनाको गाडी, डोजर लगायतका मेशिनरी तोडफोड गरेपछि आयोजना बन्द गरिएको थियो ।
पटक पटकको बन्द, हड्ताल, तोडफोड जस्ता हिंसात्मक गतिविधिले असुरक्षा बढेको भन्दै चिनियाँ निर्माण कम्पनी सिनो हाईड्रो र सगरमाथा हाईड्रोपावरले निर्माणकार्य बन्द गरेका थिए ।
युवराज श्रेष्ठ, लमजुङ
—————————————————————————————————————-
माथिल्लो मर्स्याङ्दीको निर्माण कार्य बन्द
माथिल्लो मर्स्याङ्दी जलविद्युत आयोजनाले असुरक्षाको कारण देखाउँदै पूर्वाधार निर्माण कार्य बन्द गरेको छ ।
हिमालखबर
शुक्रबार , ११ साउन २०७० ३:१९ पम
उत्तरी लमजुङको भुलभुलेमा ५० मेगावाट क्षमताको माथिल्लो मर्स्याङ्दी जलविद्युत आयोजना पूर्वाधार निर्माणको काम गरिहेको चिनिया कम्पनी सिनो हाईड्रो र नेपालको सगरमाथा हाईड्रोपावर कम्पनीले असुरक्षाको कारण देखाउँदै निर्माण कार्य बन्द गरेका छन् ।
एकबर्षदेखि पूर्वाधार निर्माणको काम भैरहेकोमा स्थानीयले पटक पटक बन्द हड्ताल, तोडफोड जस्ता हिंसात्मक घटना गराएर असुरक्षा भएकाले पूर्वाधार निर्माणको काम बन्द गर्नुपरेको निर्माण कम्पनीले बताएको छ । निर्माण कार्य बन्द हुँदा दैनिक चार लाख रुपैयाँ बराबरको घाटा लाग्ने आयोजनाका म्यानेजर झौ गौ मिनले जानकारी दिए ।
उनले सुरक्षाको प्रत्याभुती नभएसम्म आयोजना निर्माणको काम अघि बढाउन नसकिने प्रष्ट्याए । तीन बर्षमा निर्माण सम्पन्न गर्ने लक्ष्य राखिएको आयोजनामा बारम्बार अवरोध हुँदा समयमा निर्माण हुन नसक्ने आशंका बढेको छ ।
गत शनिबार खुदी स्थित छहरेखोलामा स्थानीय बालिका आकाँक्षा तामाङको बगेर मृत्यु भएपछि स्थानीयबासीले आयोजनाको आयोजनाको पाँच वटा गाडी, दुई वटा लोडर र एउटा स्काभेटर तोडफोड गरेका थिए । आयोजनाले पुल निर्माण गर्ने सहमति अनुसार पुल नबनाएका कारण बालिकालाई खोलाले बगाएको स्थानीयबासीको आरोप छ ।
बालिकाको मृत्यु पश्चात आयोजनाले बालिकाको परिवारलाई दश लाख रुपैयाँ बराबरको राहत उपलब्ध गराउने सहमति गरेको छ । गाडी तोडफोडबाट पचास लाख बराबरको क्षति पुगे पनि कसैले जिम्मेवारी नलिएको र स्थानीय प्रशासनले पनि कुनै छानविन नगरेको योजनाको निर्माण पक्षको भनाई छ ।
यस अघि निर्माण कम्पनीले काम अनुसारको ज्याला नदिएको तथा बेलाबेलामा कर्मचारीलाई निस्काशन गरेको आरोप लगाउँदै मजदुरहरुले आयोजनाको काम बन्द गराएका थिए ।
आयोजना निर्माणमा असुरक्षा बढेको भन्दै सिनो हाईड्रोले चिनिया दूतावासमा ईमेल मार्फत यस्तो अवस्थामा माथिल्लो मस्र्याङ्दी जलविद्युत आयोजनामा काम गर्न नसकिने ब्यहोरा सहितको पत्र पठाएको जनाएको छ ।
स्थानीय प्रशासन तथा राजनितिक दलका प्रमुखहरुलाई मंगलबार एक पत्र लेख्दै लगातार जस्तो आयोजना माथि भैरहेको आक्रमण, भौतिक सम्पत्तीको तोडफोड र कसैको निर्देशनमा भैरहेका हिंसात्मक घटनाले आफुँहरु दुःखी र असुरक्षित भैरहेको आयोजना निर्माणप पक्षले जानकारी गराएको छ ।
पत्र प्राप्त भएपछि स्थानीय प्रशासन र राजनीतिक दलका प्रमुखहरुको बैठक बसेर आयोजना निर्माण सुचारु गर्न सहयोग गर्ने निर्णय गरिएको थियो । लमजुङमा क्रियाशिल पाँच राजनीतिक दलका प्रमुख, स्थानीय प्रशासन र आयोजनाका प्रतिनिधि सहितको बैठक ११ साउनमा सम्पन्न भएको छ । बैठकमा राजनितिक दलका प्रमुख र स्थानीय प्रशासनले आयोजना संचालनमा देखिएको समस्या समाधान गर्न सहयोग गर्ने प्रतिवद्धता जनाएका छन् ।
उत्तरी लमजुङको भूलभूलेको ङादीमा बाँध बाँधेर ६ दशमलब ५ किलोेमिटर सुरुङबाट भुलभूलकै वडा नम्बर ३ को मस्र्याङदी तटमा बिद्युत गृह निर्माण गर्ने आयोजनाले जनाएको छ । आयोजनाको अहिलेसम्म झण्डै २ किलोमीटर भुमिगत सुरुङ मार्ग निर्माण भइसकेको छ ।
२०७३ असोजदेखि ब्यवसायिक रुपमा बिद्युत उत्पादन गर्ने लक्ष्य लिएको सो आयोजनामा चाइनिज कम्पनी सिनो हाइड्रोको ९० र नेपालको सगरमाथा हाइड्रोपावरको १० प्रतिशत लगानी छ । रन अफ द रिभर प्रविधिमा बन्न लागेको सो आयोजना निर्माणका लागि झण्डै १० अर्ब रुपैयाँ लाग्ने कम्पनीले जनाएको छ ।
५ बर्षसम्ममा निर्माण सक्ने लक्ष्यका साथ पूर्वाधारको निर्माण थालेको आयोजनाले बिद्युत प्राधिकरणसँग बिद्युत उत्पादन हुने बर्ष प्रतियुनिट ६ दशमलब ९५ सेन्टमा पिपिए गरेको छ ।
युवराज श्रेष्ठ, लमजुङ