अर्थ/बजारसोमबार, साउन २८, २०७०
उद्योग दर्ता ह्वात्तै बढ्यो, विदेशी लगानी तेब्बर
उद्योग विभागका अनुसार, आर्थिक वर्ष २०६९/७० मा ४ सय ४५ वटा उद्योग दर्ता भएका छन् । यी उद्योगहरुले १ खर्ब १७ अर्ब लगानीको प्रस्ताव गरेका छन् ।
आर्थिक वर्ष २०६८/६९ मा विभागमा दर्ता भएका उद्योगको संख्या २ सय ७९ मात्र थियो । यी उद्योगहरुले ८४ अर्ब रुपैयाँ लगानीको प्रस्ताव गरेका थिए । दर्ता उद्योग संख्या र लगानी प्रस्ताव बढ्नुले अलिकति मात्रै वातावरण सुध्रिंदा पनि उद्योगीहरु लगानीका लागि तयार भएको संकेत गर्छ ।
गत आर्थिक वर्षमा दर्ता भएका उद्योगहरुले ३२ हजार ५६ रोजगारी सिर्जना गर्ने अपेक्षा छ । आर्थिक वर्ष २०६८/६९ मा दर्ता उद्योगहरुले १६ हजार ९सय ८० जनालाई रोजगारी सिर्जना गर्ने अपेक्षा गरिएको थियो ।
आव २०६८/६९ मा ७ अर्ब १४ करोड लगानी प्रस्ताव गर्ने २ सय २७ उद्योगले अनुमति पाएका थिए भने २०६९/७० मा विदेशी लगानीका उद्योग र प्रस्तावित लगानी तेब्बर भएको छ ।
विभागबाट आर्थिक वर्ष २०६९/७० मा २१ अर्ब ४२ करोड रुपैयाँ लगानीको प्रस्ताव गरेका ३ सय १७ विदेशी लगानीका उद्योगले अनुमति पाएका छन् । लोडसेडिङ, श्रम समस्या तथा अस्थिर राजनीतिका बाबजुद विदेशी लगानीको प्रस्ताव तेब्बर बढ्नु सकारात्मक हो ।
औद्योगिक सम्पत्तिको दर्तामा पनि व्यवसायीहरु सचेत बन्न थालेको तथ्यांकले देखाएको छ । गत आर्थिक वर्षमा २ हजार ५ सय १८ वटा ट्रेडमार्क दर्ता भएका छन् । आर्थिक वर्ष २०६८/६९ मा १ हजार ५ सय ७८ वटा मात्र ट्रेडमार्क दर्ता भएका थिए । त्यस्तै, ०६८/६९ मा ४ वटा डिजाइन दर्ता भएकोमा गत आवमा १४ वटा डिजाइन दर्ता भएका छन् ।
रमेश कुमार