२९ साउनमा राजधानीको वल्र्ड ट्रेड सेन्टरमा नायक राजेश हमालसँगै पूर्व मिस नेपाल रुबी राणा, संगीतकार महेश खड्कालगायतले गायिका सुनिता दुलालको म्युजिक भिडियो संग्रह संयुक्त रूपमा सार्वजनिक गरेका छन् ।

समारोहको सभापतित्व ग्रहण गरेका हमालले आफू तीन वर्षदेखि तीजसँग जोडिएको भन्दै तीन वर्षअघि पोखरामा खाना खाँदै गरेको रेस्टुरेन्ट स्थानीय महिलाले दर खान बुक गरेको र आफूलाई त्यहींबाटै उपयुक्त दुलही छान्न भन्दै ठट्टा गरेको सुनाए ।

तीजलाई नेपाली महिलाहरुले अभिव्यक्ति स्वतन्त्रता दिवसका रुपमा पनि उपयोग गरिरहेको हमालको भनाई थियो ।
पूर्व मिस नेपाल रुवी राणाले तीजका गीतमा विकृति पनि आइरहेको भन्दै सुनिताका गीतहरु मौलिक र सभ्य रहेको धारणा व्यक्त गरिन् ।

‘आयो हरितालिका’ भिडियो संग्रहमा सात वटा गीतका भिडियो संग्रहित छन् । तीमध्ये ‘नाच्नलाई पैताला, भाँच्नलाई कम्मर’ र ‘यसपालिको तीजमा’ नयाँ भिडियो हुन् ।

कुमार विवाहितको शब्द र महेश खड्काको संगीत रहेको एल्बमको एउटा गीतमा दीपक लिम्बुको स्वर छ ।

राजेश हमाल, सुनीता दुलाल, राधा लम्साल र आशिष खड्काको अभिनय रहेको भिडियोको निर्देशन शंकर बिसी र गोविन्द राईले गरेका छन् ।

प्रतिकृया दिनुहोस