गाऊँ गाऊँबाट उठ, बस्ती बस्तीबाट ऊठ
यो देशको मुहार फेर्नलाई ऊठ…..

भोजपुर, दावाका श्याम तमोट (५९) ले २०३१ मा लेखेर संगीत भरेको यो गीतको लोकप्रियता अहिले पनि उस्तै छ । भोजपुर क्याम्पसको कार्यक्रमका लागी तयार पारेको यो गीत जनगायक रामेशको हातमा पुगेपछि लोकप्रिय भएको थियो । जसलाई १९ साउनमा नेपथ्य समुहका अमृत गुरुङले बेलायतको विश्व प्रसिद्ध वेम्बली एरेनामा समेत गुञ्जाए ।

यो गीतले २०३६ को जनमत संग्रह, २०४६ को पञ्चायत बिरोधी जनआन्दोलन र २०६२/२०६३ को दोश्रो जनआन्दोलनलाई कोरामिन हालेको थियो । २०५२ मा नेकपा माओवादीले सुरु गरेको शसस्त्र द्वन्द्वमा पनि उसले गाऊँ गाऊँमा यही गीत गुञ्जायो ।तर, प्राय भोजपुरतिरै बस्ने र बेला बेला राजधानी आउने तमोट भने गीत जसरी कहिले चर्चामा रहेनन् ।

नसोचेको सफलता
२०४६ को जनआन्दोलनको कथामा बनेको ‘बलिदान’ फिल्ममा समावेश यो गीत १६ भाषामा रेकर्ड भएको छ । जसको बारेमा साउन तेश्रो सातामा काठमाडौं इन्द्रचोकमा भेटिएका तमोट भन्छन्, ‘गीत लेख्दा यत्रो प्रसिद्धी पाउँने कल्पना गरेको थिइन ।

स्कुले विद्यार्थी छदै राल्फाका रामेश–मञ्जुलहरुको गीत भोजपुरमा सुनेपछि उनी त्यस्ता गीतहरुबाट प्रभावित बनेका थिए । २०२९ मा धरानमा क्याम्पस पढन झ्रेपछि गोविन्द विकल, बम देवानजस्ता कवीहरुको संगतले उनमा त्यस्ता गीतप्रतिको रुची अरु बढायो । साथी रमेश श्रेष्ठसँग मिलेर धरानमा त्यस्ता गीत गाउँन थालेका उनी पढाई सकेर भोजपुर फर्कदासम्म गीतार बजाएर गाउँन सिपालु भइसकेका थिए ।

त्यस्तै बेला भोजपुर क्याम्पसको विद्यार्थी युनियनको कार्यक्रममा गाउने गीत लेख्न उनलाई आग्रह आयो । र उनले यो गीत लेखे । त्यहाँ गाएको गीत सुनेका एकजना युवाले रामेशलाई त्यो गीत दिए । त्यस्तै गीत गाउँदै हिड्ने रामेशलाई यो गीतले नछुने कुरै थिएन । उनले गाउँन थालेपछि यो गीतले चर्चा पाएको मान्ने तमोट भन्छन्, ‘रामेश दाईको हातमा नपुगेको भए यो गीतले यति प्रसिद्धि पाउदैनथ्यो ।’

२०३६ को जनमत संग्रह र त्यसपछिका स्वयियु निर्वाचनमा गाउन थालिएपछि बिद्यार्थीहरुले यो गीतलाई गाउँगाउँ पु¥याए । २०४६ मा आन्दोलन सफल भएपछि यो गीतले अरु फैलिने मौका पायो ।

भावी योजना
२३ वर्ष शिक्षण पेशामा रहेर २०५७ मा सेवा निवृत भएका तमोट शहरको मोहमा कहिल्यै परेनन् । अहिले पनि उनी भोजपुरमै सामाजीक काममा क्रियाशिल छन् । सयौ गीत लेखेका उनका दुई दर्जन गीत रेकर्ड भएकाछन् ।जसमा संघर्ष हो जीवन, जीवन संघर्ष हो…, हिड मेरा भाई हो झ्म्पल बोकेर…, मन भीत्र के छ ठुली किन बोल्दीनौ… गीत चर्चित छन् । संघर्ष हो जीवन गोविन्द विकलसँग मिलेर लेखेका थिए भने मनभीत्र के छ ठुली… न्युह बज्रचार्यको संगीतमा गुलाम अलीले गाएकाछन् ।

नेपालको राजनैतिक परिवर्तनमा ठूलो भूमिका रहेको गीत संगीतको महत्व कायम राख्न पछिल्लो समय रामेश र रायनको अगुवाईमा निर्मित ‘सार्थक जन संगीत प्रतिष्ठान’ मा उनी आवद्ध भएका छन् । जसमा पूरै समय लाग्न उनी अब केहि समयमै काठमाडौं आउँदैछन् । तमोट भन्छन् ‘अबको बाँकी जीवन त्यही प्रतिष्ठानमा लगाउने योजनामा छु ।’
राष्ट्रिय प्रतिभा पुरस्कार २०६९ बाट पुरस्कार पाएकोमा र ‘गाउँ गाउँबाट…’ त्रिभुवन बिश्वविद्यालयको बीएडमा पढाई हुन थालेकोमा खुसी देखिएका तमोट भन्छन् “केही पाउने लोभ कहिल्यै नराखेको भएपनि मेरो गीतले प्रसिद्धी पाएको र राष्ट्रले पनि सम्मान दिएकोमा धेरै खुसी छु ।”
अनुशील

प्रतिकृया दिनुहोस