म्याग्दीको सदरमुकाम बेनीमा ७ असारमा आयोजित पत्रकार सम्मेलनमा बोल्दै उनले दल विशेषको चित्त नबुझेर सडकबाट राजीनामा माग्दैमा राजिनामा दिने नभई संविधानसभा समेत नरहेको अवस्थामा सहमति कायम भएमा मात्रै प्रधानमन्त्रीको राजीनामा आउने बताए । एमाओवादी अध्यक्ष पुष्पकमल दाहालले ६ असारमा सहमतिका लागि प्रधानमन्त्रीको राजीनामा आउने धारणा राखेको भोलिपल्ट पौडेलले यस्तो भनाइ सार्वजनिक गरेका हुन् ।

सल्लाहकार पौडेलले पार्टी फुटाएर क्रान्ति सम्भव नभएको बताए । पार्टी एकताको पक्षमा हुँदाहुँदै वैद्य पक्षले क्रान्ति र वर्ग मुक्तिका लागि भन्दै पार्टी फुटाउनु दुर्भाग्यपूर्ण रहेको बताउँदै वामशक्ति एकताबिना क्रान्ति र वर्गमुक्ति सम्भव नभएको उल्लेख गरे ।

प्रधानमन्त्रीका राजनीतिक सल्लाहकार पौडेलले भने, “पार्टी एकताबाट विचलित बनेर छुट्टै पार्टीको घोषणा गरी क्रान्ति गर्र्छौँ भन्नु वैद्य समूहको आवेगको परिणाम हो ।”  क्रान्ति फुटेर र आवेगको निर्णय नभई निश्चित लक्ष्य, कार्यदिशा, निशाना बनाएर निश्चित वर्गको मुक्तिका लागि हुने भन्दै पौडेलले वैद्य समूहको निश्चित निशाना र कार्यदिशा नभएकाले विद्रोह र क्रान्ति सम्भव नभएको उल्लेख गरे ।

वैद्य पक्षको आग्रहमा पार्टी अध्यक्ष नेतृत्व परिवर्तनका लागि र प्रधानमन्त्री पद त्याग्न तयार थिए, पौडलले भने,”लामो समयदेखि पार्टी नेतृत्वविरुद्ध उनीहरु आइलागे तर पार्टी कुनै कारबाही गरेन, आखिर आफै नयाँ पार्टीको घोषणा गरे ।”

प्रतिकृया दिनुहोस