एन्फाका प्रमुख कार्यकारी अधिकृत इन्द्रमान तुलाधारका अनुसार सहभागी खेलाडीले लगनखेलस्थित नेपाली सेनाको सैनिक खेलकुद तथा शारीरिक तालिम केन्द्रका दुई मैदान, भद्रकालीस्थित सैनिक जङ्गी अड्डाको मैदान र नक्सालस्थित प्रहरी प्रधान कार्यलयको मैदानमा अभ्यास खेल खेल्ने छन् ।

प्रतियोगिताका १५ खेलहरूमध्ये समूह चरणका तीन खेल सशस्त्र प्रहरीको मुख्यालय हल्चोकस्थित मैदामा खेलाइने छ भने बाँकी १२ खेल त्रिपुरेश्वरस्थित दशरथ रङ्गशालमा सञ्चालन हुनेछन् ।

खेलाडीलाई प्रतियोगितामा सहभागी हुनुपूर्व अभ्यास खेलको आवश्यकता पर्ने भएकाले काठमाडौँमा उपलब्ध भएका खेल मैदानमध्येका उत्कृष्ट मैदान छनोट गरिएको एन्फा महासचिव धीरेन्द्र प्रधानले बताए ।

कुन देशका खेलाडीलाई कुन मैदानमा अभ्यास खेल खेल्न दिने भन्ने विषयको टुङ्गो अझै भइसकेको छैन ।

प्रतियोगितामा सार्कमा आबद्ध आठवटै राष्ट्र सहभागी हुने एन्फाले जनाएको छ । सहभागी खेलाडी ८ भदौदेखि नै नेपाल आउने क्रम शुरु भइसकेको छ ।

यसैबीच साफ च्याम्पियनसिपको तयारीका लागि अभ्यास खेल खेल्न वैदेशिक यात्रामा निस्किएको नेपाली राष्ट्रिय टोली ९ भदौ राति स्वदेश फर्किएको छ ।

प्रतिकृया दिनुहोस