तस्वीर: ऋषिराम कट्टेल

काठमाडौंमा २८ भदौमा आयोजित क्यान्सर रोगसम्बन्धी कार्यक्र्ममा प्रमुख अतिथि भएकी नायिका मनिषा कोइरालाले अब ६/७ महिना आराम गरेपछि अभिनयमा फर्कने बताएकी छन् । उनले भनिन्, “चलचित्र अभिनय नै आफ्नो कर्मथलो भएकाले त्यतातिर फर्किन्छु ।”

नेपाल क्यान्सर सोसाइटी, अमेरिकन क्यान्सर सोसाइटी र विनयतारा फाउन्डेसनद्वारा क्यान्सर रोकथामसम्बन्धी नेपालमा पहिलोपटक आयोजित कार्यक्रममा मनिषाले भनिन्, “मैले यो विजय मृत्युमाथि नै प्राप्ति गरेँ । मलाई लाग्छ, क्यान्सर मृत्युको पर्यायवाची होइन क्यान्सरविरुद्धको लडाइँ जित्न सकिँदो रहेछ ।”

दुई वर्षअघि काठमाडौंमा रहेकी नायिका कोइरालाले आफूलाई असजिलो भएपछि उपचारका लागि भारत हुँदै अमेरिका पुगेकी थिइन् । अमेरिकामा उनलाई क्यान्सर भएको पत्ता लाग्यो । कोइरालाले अनुभव सुनाइन्, “मैले मन दरो बनाएँ, हिम्मत कसेँ । चिकित्सकले पनि चिन्ता नगर्नु भने ।”

नायिका कोइरालालाई गर्भाशयको क्यान्सर भएपछि अमेरिकामा शल्यक्रिया गराएकी हुन् । आफ्नो सकारात्मक सोच र इच्छा शक्तिले क्यान्सरबाट बचाएको कोइरालाको दाबी छ ।

“बिहान ४ बजे उठ्छु, योगा गर्छु । बिहान अर्गानिक ब्रेकफास्ट खान्छु,” कोइराला भन्छिन, “अहिले ठीक समयमा उठ्नु ठीक समयमा सुत्नु मेरो दैनिकी हो ।” उनले उपचारका बेलाका आफ्ना तस्वीर समेत देखाइन् ।

कार्यक्रममा भारतीय चिकित्सक प्रा डा दिनेश पन्दुकरले रोगका विरुद्धमा लड्न सक्ने क्षमताले आधा रोग निको हुने र त्यो क्षमता नायिका मनिषामा भएको बताएका थिए ।

ऋषिराम कट्टेल, काठमाडौं

प्रतिकृया दिनुहोस