समाचारबुधबार, आषाढ १३, २०६९
शरतसिंह भण्डारीको नेतृत्वमा ‘राष्ट्रिय मधेश समाजवादी पार्टी’ गठन
राजधानीमा १३ असारमा सम्पन्न भेलाले नयाँ पार्टी गठन गर्ने निर्णय गरेको हो । भेलाबाट नयाँ पार्टीको नाम, विधान र झण्डा समेत टुंगो लागिसकेको छ । नेता भण्डारीले हिमालखबरसँग भने, “पार्टी बनिसक्यो घोषणा हुन मात्रै बाँकी छ ।”
मधेशी जनतालाई अधिकार सम्पन्न गराउने उद्देश्यले गठन भएको फोरम लोकतान्त्रिक आफ्नो नीति र सिद्धान्तमा विचलित भएपछि आफूहरूले नयाँ पार्टी स्थापना गरेको भण्डारीले बताए । आफ्नो पार्टीले आदिवासी जनजाति र दलितको मुद्दा पनि उठाउने भण्डारीको भनाइ छ ।
१४ असार बिहान ११ बजे पत्रकार सम्मेलन आयोजना गर्नुभन्दा पहिला मोटरसाइकल र्याली गरिने पूर्वसभासद् तथा नवगठित पार्टीका नेता कौशलकुमार राय यादवले जानकारी दिए । भण्डारीलाई फोरम लोकतान्त्रिकका अध्यक्ष विजयकुमार गच्छदारले कारबाही गरेपछि यादव लगायत १० केन्द्रीय सदस्यले सामूहिक राजीनामा दिएका थिए ।