पार्टीका वरिष्ठ उपाध्यक्ष मोहन वैद्यलगायतका केही नेताहरूले पार्टी फुटाएर नयाँ पार्टी गठन गरिसकेको अवस्थामा पार्टीलाई कसरी अगाडि बढाउने भन्ने विषयमा प्रष्ट धारणा बनाउन अध्यक्ष दाहाल व्यस्त भएको बताइएको छ ।

पार्टी पोलिटव्यूरो सदस्य लोकेन्द्र विष्टका अनुसार पार्टीबाट बाहिर गएकाहरूलाई समेत एकीकृत पार्टीमा आउने वातावरण तयार पार्ने गरी अध्यक्षले प्रतिवेदन लेख्ने काम गरिरहेकाछन् ।

पार्टीभित्र बढ्ने अराजकता तथा अनुशासनहीनतालाई अन्त्य गर्ने उत्तम उपायको बारेमा समेत नयाँ विधि तयार पारिने भएको छ, नेता विष्टले भने – ‘कम्युनिस्ट आन्दोलनमा बेलाबखत देखिने टुटफूटलाई सम्बोधन गर्ने गरी अध्यक्षले राजनीतिक प्रतिवेदन तयार गर्न लाग्नुभएको छ ।’

संविधानसभाको विघटन, पार्टीमा आएको फूट, आगामी राजनीतिक कार्यदिशा लगायतको विषयमा पार्टीकै केही वरिष्ठ नेताहरूसँग छलफल गरेर प्रतिवेदन तयार पार्न लागेको बुझिएको छ ।

यसैगरी पार्टीमा खाली रहेको उपाध्यक्ष, महासचिव, सचिव र स्थायी समिति तथा पोलिटव्यूरो सदस्यहरूमा थप गर्ने सदस्यहरूका बारेमा पनि अध्यक्ष दाहालले छलफल गरेकाछन् । तर क–कसलाई ती पदहरूमा लैजाने भन्ने विषयमा भने कुनै निर्णय गरिएको छैन ।

प्रतिकृया दिनुहोस