राष्ट्रिय टीमका पुर्व फुटबल प्रशिक्षक ग्राहम रोबर्ट्सले नेपालमा प्राविधिक रुपमा राम्रा खेलाडी भएपनि फुटबलको पुर्वाधार र लिगको उचित व्यवस्थापनको कमीले नेपाली फुटबलस्तर उठ्न नसकेको बताएका छन् । बिबिसी विश्व सेवाको वर्ल्ड फुटबललाई दिएको अन्तर्वार्तामा रोबर्ट्सले आफुले दक्षिण एसियामा बटुलेको अनुभव साटेका थिए ।
नेपालमा आफ्नो कार्यकालका दिन सम्झिँदै उनले भने, “जब मलाई पहिले ३ महिनाको लागि नियुक्त गरियो, त्यो बेलाको एजेन्डा एएफसी च्यालेन्ज कपमा छनौट हुनु थियो । काम गर्न सार्है अप्ठ्यारो भए पनि मैले मेहनत निकै गरें । मैदानमा घाँस भन्दा धुलो बढी भएकोले मैदान खराब थियो ।” रोबर्ट्सले भने “मसँग तयारी खेलका लागि रहेका ३२ खेलाडीहरु प्राविधिक रुपले राम्रो भएपनि फिटनेसको मामलामा अल्छि थिए । मैले उनीहरुलाई यदि यस्तो हो भने तिमीहरुले कहिले पनि खेल जित्दैनौ पनि भनेँ । ”
अहिलेको फुटबलमा शारीरिक रुपले बलियो हुन आवश्यक भएपनि ९८ प्रतिशत खेलाडीहरु कहिले पनि जिमखाना नगएको कुरा अगाडि ल्याउँदै रोबर्ट्सले खेलाडीहरुले पर्याप्त पौष्टिक खाना नपाएको कुरा बताए ।” उनीहरुले हप्तामा एक या दुइ पटक मात्रै मासु र अन्य प्रोटीन युक्त खाना खान पाउँछन् । यस बाहेक अन्य समय दाल भात तरकारी नै खाने भएकोले मैले प्रोटीन धेरै भएको खाना खान जोड दिएँ साथै खेल अघि कार्बोहाइड्रेट युक्त खानेकुरा खानुपर्ने पनि सिकाएँ । किनभने ९० मिनेटको खेलमा उनीहरु ४० मिनेट नबित्दै गलिसकेका हुन्थे । ”

फुटबल भनेपछि हुरुक्कै हुने नेपालमा सरकारले फुटबलमा लगानी गर्न र स्तर सुधार्न आवश्यक रहेको बताउँदै उनले राष्ट्रिय लिगलाई व्यवस्थित बनाएर लामो समयसम्म चलाउन जरूरी रहेको कुरा पनि जोड दिए ।

नेपाल आउनुअघि पकिस्तानको राष्ट्रिय टोलीको प्रशिक्षकको भूमिका निभाइसकेका रोबर्ट्सले त्यहाँको सुरक्षा स्थितीको कारण काम गर्न कठिनाइ भएको कुरा अन्तरवार्ताको क्रममा भने । नेपालको बसाइ एक रमाइलो अनुभव भएकोले फेरी दक्षिण एसियाली क्षेत्रमा काम गर्ने मौका पाएमा स्विकार्ने उनले बताए । ” म त्यहाँ जाँदा नेपाल विश्व वरियतामा १७८ मा थियो । तर ५-६ महिना भित्रै मैत्रीपुर्ण खेल र अरु प्रतियोगितामा गरेको राम्रो प्रदर्शनले नेपाल १३५ मा पुग्यो । तर अहिले फेरी १५५ मा झर्नु दु:ख लाग्दो कुरा हो किनभने उनीहरुले पर्याप्त खेल्ने अवसर पाएका छैनन् । ”

जापान, अष्ट्रेलिया र दक्षिण कोरिया जस्ता एशियाली शक्तिको स्तरमा दक्षिण एशियाली देशहरु पुग्न र विश्वकप खेल्ने अवसर पाउन निकै कठिन भएको स्विकारे पनि आफुमा विश्वास भने हुनुपर्नेमा रोबर्ट्सले जोड दिए । “हामी पहिलो पटक विश्व कप छनौटको दोस्रो चरणमा पुग्यौँ जुन राम्रो उपलब्धि हो । जोर्डनसँग पहिलो लेगमा ९-० ले हारे पनि दोस्रो लेगमा उत्कृष्ट खेल्दै १-१ को बराबरी गर्यौँ ।”

” नेपाली टोलीले थोरै अन्तरराष्ट्रीय खेल खेल्छ र बिदेशी भुमीमा एक्स्पोजर निकै कम भएकोले “प्रेसर ह्यान्डल” गर्न सक्दैन । त्यसैले बढी भन्दा बढी अन्तरराष्ट्रीय म्याचहरु खेल्नु पर्छ । थाइल्यान्डजस्ता देशहरुसँग नेपालले खेल खेल्दै अघि बढ्न आवश्यक छ । ” २०११ को जनवरीमा नेपाली राष्ट्रिय फुटबल टोलीको प्रशिक्षक बनेका ग्राहम रोबर्ट्सले गत मार्चमा सम्पन्न एएफसी च्यालेन्ज कप पछी पदबाट राजिनामा दिएका थिए । प्रतियोगितामा नेपाल गोलको खाता खोल्न असफल रहँदै समुह चरणका सबै तीन खेलमा पराजित भएको थियो ।

प्रतिकृया दिनुहोस