अन्तर्वार्ता/विचारसोमबार, कार्तिक २५, २०७०
नीर शाह भन्छन्, ‘अब राजनीति गर्छु’
नेपाली कांग्रेसमा किन प्रवेश गर्नुभएको हो ?
म मानवअधिकार, व्यक्तिगत स्वतन्त्रता, उदारवाद र मानव मुक्तिमा विश्वास राख्ने व्यक्ति हुँ । जीवनका यी मूल्य र मान्यताहरु पूरा गर्न नेपाली कांग्रेसबाट सम्भव देखेकाले प्रवेश गरेको हुँ ।
केही समयअघि एमाओवादीमा पनि प्रवेश गर्नुभएको होइन र ?
होइन । एमाओवादीबाट चलचित्र विकास बोर्डका अध्यक्ष भएका गणेश भण्डारीले ल्याएका नीति चलचित्र क्षेत्रको विकासका लागि उपयुक्त थिए । फुट्नुअघि माओवादीले लिएको राष्ट्रियता सम्बन्धी मुद्दा पनि चित्तबुझदा थिए । त्यसैले ती नीति र मुद्दालाई समर्थन गरेको हुँ । तर, ती नीति विस्तारै हराए । युवराज लामा लगायतका साथीहरु एमाओवादी प्रवेश गर्दा शुभकामना दिन भने गएको थिएँ । तर, म माओवादी बनेको अनर्गल प्रचार गरियो ।
अब राजनीति नै गर्नुहुन्छ त ?
निश्चय नै । मैले लेखेको ‘गहिराइमा डुब्दै नडुब, डुबिसकेका छौ भने मोती नटिपी नफर्क’ भन्ने गीत मेरो जीवनसँग सधैं मेल खान्छ । त्यसैले राजनीतिमा अब म गहिराइ छुने गरी लाग्छु ।
कलाकार र पेशाकर्मीले राजनीतिमा प्रवेश गर्नु ठीक हो ?
पेशामा भएको व्यक्तिले राजनीति गर्नै हुन्न भन्ने होइन । तर, कलाकर्म र राजनीतिलाई एकै ठाउँमा मिसाउनु भने हुँदैन ।
कलाकारितालाई पनि समय दिनुहुन्छ ?
अब मेरो धेरै समय राजनीतिमा नै बित्छ । तर पनि म मूलतः कलाकार भएकाले कलाकर्म छोड्दिनँ । राजनीतिबाट निस्केको समय कलाकर्ममा बिताउँछु ।