नेपाल बन्दको विरोधमा र्‍याली निकाल्ने निर्णय किन गर्नुभएको हो ?
निजी क्षेत्र र नेपाल उद्योग वाणिज्य महासंघ नेपाल बन्द हुनुहुँदैन भन्ने पक्षमा छ । बन्दले मुलुकमा दैनिक रु.२ अर्ब भन्दा बढी घाटा हुने र अर्थतन्त्र थप जर्जर बन्ने भएकाले हामीले बन्दको विरोध गरेका हौं ।

गाडी चलाउने र पसल खोल्ने काम तपाईंहरूले गर्नुभएन नि ?
माओवादी लगायत ३३ दलीय मोर्चासँग हामीले संवादमा जोड दिएका थियौं । हाम्रै आग्रह र दबाबले उहाँहरूले १० दिनको आम हड्ताललाई यातायात बन्दमा सीमित गर्नुभयो । हामीले बन्द स्वीकार्दैनौं भने पनि ‘राजनीतिक माग’ भन्दै उहाँहरूले फिर्ता लिन मान्नु भएन । अब सरकारले सवारी साधन चलाउन सुरक्षाको विश्वासिलो आधार तयार पार्नुपर्छ ।

आवश्यक परे प्रतिकार पनि गर्ने भन्नुभएको छ नि ?
हामीले बन्द विरुद्ध मोटरसाइकल र्‍याली निकालेर भद्र अवज्ञा गर्‍यौं । स्थानीय र लामोदूरीका सवारी साधन पनि चलेका छन् । बन्दको अवज्ञा गर्नु भनेकै प्रतिकार हो ।

निजी क्षेत्रका मानिस दलहरूमा लागेकैले बन्द आयोजना गर्नेलाई सजिलो भएको भनिन्छ नि ?
विचार सबैको हुने भएकाले निजी क्षेत्रका साथीहरू पनि दलमा आबद्ध हुनु अस्वाभाविक होइन । तर, व्यावसायिक हित र आर्थिक गतिविधिको सुनिश्चितता सबै व्यवसायीको प्रतिबद्धता हो । जो जुन दलमा भए पनि बन्द, हड्ताल विरुद्ध निजी क्षेत्र एक हुने कारण पनि त्यही हो ।

सधैंका लागि बन्द नहुने उपाय सिर्जना गर्न पहल गर्ने योजना पनि छ कि ?
हामीले राजनीतिक दलहरूबाट बन्द विरुद्धको प्रतिबद्धता माग गरेका छौं । हिजो एमाओवादीले ६ दिने आम हड्ताल गर्दा पनि बसन्तपुरमा शान्तिसभा गर्‍यौं । जातीय राज्यको पक्ष र विपक्षमा नेपाल बन्द हुँदा पनि मैनबन्दी जुलूस निकाल्यौं । हामीले आफ्नो तर्फबाट गरेकै छौं ।

साप्ताहिक खबरपत्रिका हिमालबाट

प्रतिकृया दिनुहोस