नेपाल क्रिकेट संघ (क्यान) ले राष्ट्रिय क्रिकेट टीमका खेलाडीलाई नगर परिक्रमा गराउने तयारी गरेको छ । युएईमा ट्वान्टी– २० विश्वकप क्रिकेट छनोट खेलेर स्वदेश फर्किएको चार दिन पछि १९ मंसीरमा क्रिकेट खेलाडीलाई नगर परिक्रमा गराइने क्यानका महासचिव अशोकनाथ प्याकुरेलले हिमालखबरसँग बताए ।

प्याकुरेलले भने, “क्रिकेट खेलाडीलाई औपचारिक रुपमा १९ मंसीरमा नगर परिक्रमा गराउने क्यानले निर्णय गरेको छ ।” छनोट प्रतियोगितामा तेस्रो भएको राष्ट्रिय टीम १६ मंसीर साँझ ६ बजे स्वदेश फर्किदै छ ।

खेलाडीहरुलाई त्रिभुवन अन्तर्राष्ट्रिय विमानस्थलमा स्वागत गरिने क्यानले जनाएको छ । राष्ट्रिय टीमलाई मुख्य सचिव लीलामणी पौडेलले स्वागत गर्ने तयारी भइरहेको छ ।

युएईमा भएको आईसीसी ट्वान्टी–२० विश्वकप छनोटमा १२ मंसीरमा हङकङलाई हराउँदै नेपाल ट्वान्टी– २० विश्वकपमा पुगेको छ । प्रतियोगितामा नेपालले तेस्रो स्थान हात पार्‍यो । अबुधावीमा १५ मंसीरमा आयोजक युएईलाई ५ विकेटले हराउँदै नेपाल तेस्रो भएको हो ।

नेपालले२९ पुषदेखि न्यूजिल्याण्डमा एक दिवसीय विश्वकप छनोट खेल्दैछ । त्यसलगत्तै २ चैतदेखि बंगलादेशमा हुने ट्वान्टी– २० विश्वकप क्रिकेटमा नेपाली क्रिकेट टीम सहभागी हुँदैछ ।

प्रतिकृया दिनुहोस