अर्थ/बजारसोमबार, मंसिर २४, २०७०
नदी नियन्त्रणका लागि भारतद्वारा ३७ करोड सहयोग
वाग्मती, लालबकैया र कमला नदी नियन्त्रणका लागि तटबन्धको निर्माण गर्न नेपाल सरकारलाई भारतले अनुदान सहयोगस्वरुप करिब ३७ करोड रुपैंया प्रदान गरेको छ । नेपालका ती नदी भारतसँग सीमा जोडिएका छन् ।
वर्षातमा जलउत्पन्न प्रकोपका कारणले वर्षेनी नेपाली पक्षले भौतिक क्षति सम्बन्धि पीडा भोग्नु परिरहेको छ । नेपाल–भारत डुबान तथा बाढी व्यवस्थापन संयुक्त समितिको सातौं बैठकको निर्णयअनुसार भारत सरकारले उक्त रकम ती नदी नियन्त्रणका लागि निकासा गरेको हो ।
सिँचाइमन्त्री उमाकान्त झालाई नेपालका लागि भारतीय राजदूत रञ्जित रेले २४ मंसीरमा रकम हस्तान्तरण गरे । यसअघि भारत सरकारबाट वाग्मती नियन्त्रणका लागि करिब ७५ करोड रुपैंया, लालबकैया नियन्त्रणका लागि ७७ करोड र कमला नियन्त्रणका लागि १ अर्ब १९ करोड रुपैंया प्रदान गरिसकेको छ । यसबाट वाग्मतीमा ४० किमि, लालबकैयामा ६१ किमि तथा कमलामा ६६ किमि गरी १६७ किमि तटबन्ध निर्माण भइसकेको छ ।
कार्यक्रममा मन्त्री झाले वर्षात्मा ढुवानी समस्या समाधान गर्न दुई देशबीच थप आपसी सहयोगको खाँचो औल्याए । मन्त्रालयका सचिव प्रतापकुमार पाठक र जलउत्पन्न प्रकोप नियन्त्रण विभागका महानिर्देशक प्रदीपराज पाण्डेले बाढीको प्रभावकारी व्यवस्थापनमा भारत सरकारले प्रदान गरेको सहयोगका लागि नेपाल सरकारका तर्फबाट धन्यवाद दिए ।
रासस