काठमाडौंमा जारी एनसेल कप फुटबल प्रतियोगिताको सेमिफाइनलमा नेपाल आर्मीलाई ब्वाईज युनियन क्लबले हराएको छ । २९ मंसीरमा दशरथ रंगशालामा भएको खेलमा आर्मीलाई हराउँदै ब्वाईज युनियनले फाइनल यात्रा तय गर्‍यो ।

ब्वाईज युनियनले सडेन डेथमा आर्मीलाई हराएको हो । यो जीतसँगै ब्वाईज युनियनले आर्मीसँग ६ महिनाअघिको हारको बदला पनि लिएको छ । ६ महिनाअघि भएको ब्रिटिस गोर्खा कपको सेमिफाइनलमा ब्वाईज युनियन आर्मीसँग ३–० ले हारेको थियो ।

निर्धारित ९० मिनेट र त्यसपछि थपिएको अतिरिक्त समयमा पनि दुवै टीमले बराबर गोल गरेपछि खेलको निर्णय टाईब्रेकरबाट भएको हो । निर्धारित ९० मिनेटको समयमा दुवै टोलीले १–१ गोल गरेपछि खेल अतिरिक्त समयमा धकेलिएको थियो ।

आर्मीका लागि खेलको ४९ औं मिनेटमा सन्तोष नेपालीले गोल गरेर टोलीलाई अग्रता दिलाए पनि ब्वाइज युनियनका चन्द्र राईले ८० औं मिनेटमा गोल फर्काएर खेल बराबरीमा पुर्‍याए ।

त्यसपछि थपिएको अतिरिक्त समयमा पनि दुवै टोलीले १–१ गोल थपे र खेलको नतिजा टाईब्रेकरबाट निकालिएको हो । अतिरिक्त समयको ११ औं मिनेटमा ब्वाईज युनियनका विनोद लामाले गोल गरेपनि त्यसको १ मिनेट भित्रै आर्मीका नवयुग श्रेष्ठले बराबरी गोल फर्काएका थिए ।

अर्को सेमिफाईनलमा ३० मंसीरमा मनाङ मर्स्याङ्दी र संकटा क्लब भिड्नेछन् ।

प्रतिकृया दिनुहोस