झापा, जलथल–१ को रणकाली सामुदायिक वन उपभोक्ता समूहले जैबिक कोइला (बायो ब्रिकेट) उत्पादन शुरु गरेको छ । सामुदायिक वनभित्र रहेको काठ बन्न नसक्ने झाडी र पोथ्राहरु डढाई निकालिएको कोइलालाई मेशिनमा पिसी धुल्याएर माटो मिसाई मुछेर गोलाकार फर्मामा खाँदी जैबिक कोइला तयार पार्ने गरिन्छ ।

यस्तो मिसावट गर्दा सयकडा ४० माटो र बाँकी ६० प्रतिशत कोइलाको धुलो राख्ने गरिन्छ । यसरी तयार जैबिक कोइला सल्किएपछि एकघण्टासम्म बल्छ । झापाको बजारमा १२ रुपैंया २५ पैसाको भाउमा बिक्ने जैबिक कोइलाको उत्पादन लागत प्रतिगोटा ७ रुपैंया रहेको छ ।

दैनिक तीन सय थान जैबिक कोइला उत्पादन गर्ने रणकालीको उद्योगमा ११ जना कामदार कार्यरत छन् । २ लाख ७७ हजार रुपैंयाको लगानीमा शुरु गोलाकार जैबिक कोइला उद्योगको ५ पुसमा लघु उद्यम विकास कार्यक्रम मेडेपका वरिष्ठ उद्यम विकास अधिकृत राजन केसीले गोलाकार फर्माबाट कोइला निकाली उदघाटन गरे ।

गोपाल गडतौला, हिमालखबर

प्रतिकृया दिनुहोस