कलेज अध्ययन गर्न वीरगंजमा डेरा लिएर बस्दा एफएम रेडियो नभएर पल्लो कोठा गएर सुन्ने परिस्थितिमा रहेका महोत्तरीको गौशाला—२ का संजयकुमार साह (२८) को प्रगति अहिले लोभलाग्दो छ । दुई जोर लगाउने कपडा लिएर २०५८ मा वीरगञ्ज पढ्न आएका उनीसँग त्यो वेला साइकल किन्ने हैसियत थिएन भने अहिले उनले बहिनीलाई विवाहमा कार उपहार दिएका छन् । पढाइमा अब्बल रहेका उनको प्रगति मिहिनेत गरेर चार्टर एकाउन्टेन्ट (सीए) बन्न सक्दा सम्भव भएको हो ।

संजय अहिले भारतको सबैभन्दा ठूलो रियलस्टेट कम्पनी डीएलएफ लिमिटेडको साइवर सिटी गुडगाँवमा फाइनान्स एण्ड एकाउन्ट म्यानेजर छन्, मासिक भारु अढाइ लाख तलब पाउने गरी । राम्रो कमाउन थालेपछि उनले दुई वर्षअघि नयाँदिल्लीको उत्तमनगरमा भारु ३० लाखमा घर पनि किनेका छन् ।

मिहिनेतको फल

२०५८ मा एसएलसी उत्तीर्ण गरेपछि संजयलाई गाउँमै सानोतिनो व्यवसाय गरेर बुबा रामप्रितलाई सघाउन आफन्तले सल्लाह दिएका थिए । उनको घरको आर्थिक स्थिति पढाउन सक्ने नहुनु उनले त्यस्तो सल्लाह पाउनुको कारण थियो । तर, उनको पढाइ र एसएलसीको नतीजा देखेर विद्यालयका शिक्षक दुर्गाप्रसाद सिंहले वीरगञ्जमा आफ्नो लगानी रहेको ज्ञान–विज्ञान कलेज (उच्चमावि) मा पढ्न लगे । ट्यूसन पढाएर खर्च जुटाएका उनले ११ कक्षाको परीक्षामा देशभरिमा तेस्रो र १२ कक्षाको परीक्षामा राम्रो नतीजा ल्याए । उच्चमावि उत्तीर्ण गरेपछि सीए पढ्ने उनको चाहनामा घरको आर्थिक अवस्था नै पुनः बाधक बन्यो ।

तर, सीए पढेरै छाड्ने उनको अठोटको सामु घरको कमजोर आर्थिक अवस्था धेरै समय बाधा बन्न सकेन । गाउँले र आफन्तसँग केही ऋण लिएर दिल्ली पुगेपछि भने उनको अनुकूलता शुरू हुन थाल्यो । आफूसँगै पढ्ने साथीहरूलाई ट्यूसन पढाउँदै पढेर उनले सीए पहिलो वर्षको परीक्षामा भारतभरमा तेस्रो स्थान ल्याए । त्यो नतीजाले कलेजमा उनलाई चिनायो भने आत्मविश्वास पनि बढायो ।

पाँचवर्षे सीए पनि उनले भारतमा ३७ औं स्थान ल्याएर उत्तीर्ण गरे । र, ‘लान्को इन्फ्राटेक लिमिटेड’ को जागिरमा छानिए । अहिले उनले सीए पढ्न दिल्ली पुगेकी बहिनी संगीताको नाममा ‘संगीता साह एसोसियट्स’ नामको फर्म पनि खोलेका छन् । बहिनीले पनि सीए उत्तीर्ण गरिसकेकी छिन् भने भाइ पनि सीए नै पढ्दैछन् ।

सीए पढ्नेका लागि वीरगंज र काठमाडौंमा सीए इन्ष्टिच्यूट खोल्ने योजनामा रहेका संजय भन्छन्, “मैले जानेको ज्ञान नेपाली विद्यार्थीलाई बाँडेर सहयोग गर्ने इच्छा छ ।”

बिम्मी शर्मा, वीरगञ्ज

साप्ताहिक खबरपत्रिका हिमालबाट

प्रतिकृया दिनुहोस