तस्वीर: विक्रम राई्/हिमालखबर

-सेन्छेलुङ लिम्बू
कान्तिपुर टेलिजिभनको कार्यक्रम ‘कल कान्तिपुर’ का प्रस्तोता सुरज गिरी पछिल्लो समय ‘खेल कमेन्टेटर’ का रूपमा समेत चर्चित छन् । १५–२६ भदौ २०७० मा दशरथ रंगशालामा सम्पन्न आठौं दक्षिण एशियाली फूटबल संघ (साफ) च्याम्पियनसीप फूटबल र १७–२२ मंसीर २०७० मा कीर्तिपुरमा भएको ‘जर्नी टु वल्र्डकप क्रिकेट’ को कमेन्ट्री गरेपछि उनको पहिचान ‘राम्रो–भिजे’बाट ‘राम्रो–कमेन्टेटर’मा बदलिएको हो ।

अंग्रेजीमा कमेन्ट्री गरेर गिरीले जादुमयी छनक देखाइसकेका छन् । कमेन्ट्रीमा सान्दर्भिकता, तार्किकपन र दर्शकलाई मैदानमै पुगे झैं पार्न सक्नु उनको खुबी हो । गिरी भन्छन्, “सबैले राम्रो ‘रेस्पोन्स’ गरिरहेका छन्, अब यही क्षेत्रमा केही गर्न सक्छु भन्ने आत्मविश्वास बढेको छ ।”

सामान्यतया सक्रिय खेल जीवनबाट सन्न्यास लिएका वा लामो समय खेल पत्रकारिता गरेकाहरू कमेन्ट्रीमा जमेका हुन्छन् । तर, उनी चाहिं अपवाद हुन् । भर्खर २१ वर्ष पुगेका गिरी न खेल पृष्ठभूमिबाट आएका हुन् न त पत्रकारिता । काठमाडौं ज्ञानेश्वरमा जन्मिएका गिरीको सानैदेखि खेलप्रति रूचि थियो । “खेल भनेपछि सानैदेखि हुरुक्कै हुन्थें”, उनी सुनाउँछन्, “कतिसम्म भने कतिपय टेष्ट क्रिकेट चार–पाँच दिन घर बाहिर ननिस्की हेर्ने गर्थें ।” खेलप्रतिको त्यही मोह र मिहिनेतले कमेन्ट्रीतर्फ आकर्षित भएको गिरीको भनाइ छ ।

क्रिकेट र फूटबलमै कमेन्ट्री करियर अघि बढाइरहेका उनले पहिलो पटक १९–२२ कात्तिक, २०६९ को सोल्टी सुपर सिक्स क्रिकेटको कमेन्ट्री गरेको भए पनि आठौं साफ च्याम्पियनसीप फूटबलको कमेन्ट्रीले उदाउँदो कमेन्टेटरको चिनारी दिलाएको हो । अहिलेसम्म पाँच वटा प्रतियोगितामा कमेन्ट्री गरिसकेका उनका लागि १२ साउन २०६९ मा साफ यु–१६ च्याम्पियनसीप फाइनलको कमेन्ट्री ‘टर्निङ प्वाइन्ट’ बनिदियो । त्यही खेलको कमेन्ट्रीपछि उनलाई साफ च्याम्पियनसीपको प्रि–म्याच एनालाइसिसको जिम्मा पाएको वर्ल्ड स्पोर्टस् ग्रुपले त्यसको जिम्मा सुम्पियो । २४ र २७ माघ २०६९ मा नेपाल र पाकिस्तानबीचको मैत्रीपूर्ण फूटबलको समेत कमेन्ट्री गरेका उनलाई टेलिभिजनमा देखाएको प्रतिभाबाट प्रभावित कतिपय दर्शकले लामो रेसका घोडा समेत भनेका थिए ।

मिडिया टेक्नोलोजीमा स्नातक अध्ययनरत गिरीको कमेन्ट्रीले भारतीय खेलाडी तथा उत्कृष्ट कमेन्टेटर भीभीएस लक्ष्मणलाई समेत छोएको छ । जर्नी टु वल्र्डकप क्रिकेटका वेला नेपाल आएका भारतीय क्रिकेटर लक्ष्मणले ‘तिम्रो कमेन्ट्री वर्ल्ड क्लासको छ, कुन देशबाट हो ?’ भनेर हौसला थपिदिएका थिए । हुन त, साफ प्रतियोगिताको फाइनल हेर्न अफगानिस्तानबाट आएका मन्त्री सम्मिलित ४०० जनाको समूहले प्रत्यक्ष प्रसारणपछि ओबी (आउटडोर ब्रोडकास्टिङ) भ्यानमै गएर गिरीलाई धन्यवाद दिएका थिए । उनी भन्छन्, “यसले मलाई आत्मविश्वास दिलायो ।”

गिरी भन्छन्, “घरमा टीभी म्यूट गरेर अन्तर्राष्ट्रिय खेलको कमेन्ट्री रेकर्ड गर्छु र फुर्सदको वेला त्यो रेकर्ड सुन्छु । त्यसमा लाइभनेस आयो कि आएन ।” मिहिनेतमै बढी समय खर्चिने उनी साफ च्याम्पियनसीपका वेला कति रात दुईघण्टाभन्दा बढी सुतेका छैनन् । त्यतिवेलाको अनुभव सुनाउँदै उनी भन्छन्, “इन्टरनेट या पत्रपत्रिकामा सूचना खोज्दा अनि स्रोतव्यक्तिसँगको भेटघाट र कुराकानीमै समय बित्थ्यो ।”

गिरी छोटो बाटो पार गरेर कमेन्ट्रीमा आएका हुन् । ग्यालेक्सी पब्लिक स्कूल, ज्ञानेश्वरबाट एसएलसी उत्तीर्ण गरेपछि ह्वाइट हाउस कलेजमा ११ कक्षामा विज्ञान पढिरहेका वेला उनले टेलिभिजनमा बोल्ने अवसर पाएका थिए । साथीलाई घर पुर्याउन हिंडेका गिरीले इमेज टेलिभिजनको ‘भीजे हन्ट’ प्रतियोगितामा जित्ने र दुई महीनामा कार्यक्रम संचालनको अनुभव सँगाल्ने मौका पाएको बताउँछन् ।

साप्ताहिक खबरपत्रिका हिमालबाट

प्रतिकृया दिनुहोस