न्युजिल्याण्डमा २ माघमा भएको खेलमा नेपाल स्कटल्याण्डसँग ९० रनले पराजित भएको हो । स्कटल्याण्डले दिएको २५० रनको लक्ष्य नेपालले भेट्टाउन सकेन । फितलो ब्याटिङ प्रदर्शन गरेको नेपालले ४६.१ ओभरमा सबै विकेट गुमाएर १५९ रन मात्र बनायो ।

नेपालका ज्ञानेन्द्र मल्लले ३४, शरद भेष्वाकरले ३०, पृथु बास्कोटाले २१ र वसन्त रेग्मीले नटआउट २० रनको योगदान गरे । प्रदीप ऐरी १५, विनोद भण्डारी १२ अनिल मण्डल र जीतेन्द्र मुखिया ४ रन बनाएर आउट भए । सागर पुन, शक्ति गौचन र सोमपाल कामीले रन बनाउन सकेनन् ।

नेपालले टस जितेर पहिले ब्याटिङका लागि आमन्त्रण गरेको स्कटल्याण्डले निर्धारित ५० ओभरमा ७ विकेट गुमाउँदै २४९ रन बनाएको थियो । स्कटल्याण्डलाई समेट्ने क्रममा नेपालका लागि सोमपाल कामीले ३, सागर पुनले २ विकेट लिए । शक्ति गौचन र वसन्त रेग्मीले एक–एक विकेट झारे ।

१८ माघसम्म न्युजिल्याण्डमा हुने आईसीसी वान डे विश्वकप छनौटअन्तर्गत नेपालले तेस्रो खेलमा ५ माघ आइतबार हङकङ र चौंथों खेलमा ७ माघ मंगलबार क्यानडाको सामना गर्नेछ ।

प्रतियोगितामा समूह ‘ए’ मा रहेको नेपाल यसअघि यूएईसँग पराजित भएको छ । समूह चरणमा शीर्ष तीनमा रहने टीमले सुपरसिक्समा प्रवेश पाउने छ ।

सुपरसिक्समा पहिलो र दोस्रो हुने टीमले सन् २०१५ मा न्युजिल्याण्ड र अष्ट्रेलियाले संयुक्त रुपमा आयोजना गर्ने वान डे विश्वकपमा खेल्न पाउनेछन् । शीर्ष चारभित्र पर्ने टीमले भने वान डे मान्यता पाउनेछन् ।

प्रतिकृया दिनुहोस