प्रधानमन्त्री तथा मन्त्रिपरिषद कार्यलयका सचिव कृष्णहरि बास्कोटाको संयोजकत्वमा गठित वार्ता टोलीसँग १० माघ विहान वार्ता मिलेपछि अनसन तोडिने भएको हो । प्रा.डा. प्रकाश सायमीको पुनर्वहाली, संस्थानलाई स्यावत्त निकाय बनाइने, गैरकानुनी रुपमा दिन लागिएको सम्बन्धन रोक्ने लगायतका माग पुरा हुने भएपछि अनसन तोड्न लागेको डा. राजेन्द्र वाग्लेले हिमालखबरलाई जानकारी दिए ।

केसी २७ पुसदेखि आमरण अनसनमा छन् ।

प्रा‍‍.डा. केसीका सात माग

क शिक्षण अस्पताल तथा स्वास्थ्य संस्थामा राजनीतिक हस्तक्षेप बन्द गर्नुपर्ने

ख थप निजी मेडिकल कलेजलाई सम्बन्धन दिन नहुने

ग सम्बन्धन दिन लागिएको मेडिकल कलेजको विषयमा छानबिन

घ राजनीतिक–प्रशासनिक दबाबबाट राजीनामा गराइएको डीनको पुनर्बहाली

ङ त्रिविका भ्रष्ट उपकुलपति, रेक्टर, रजिस्ट्रार र भ्रष्टाचारमा दोषी ठहरिएका पूर्व पदाधिकारीहरूमाथि कारबाही

च आईओएमलाई स्वायत्तता, ग्रामीण भेगमा सरकारी मेडिकल कलेज स्थापना र

छ वरिष्ठता तथा कार्यदक्षताको आधारमा स्वच्छ प्रक्रियाबाट पदाधिकारी नियुक्ति ।

प्र.डा. केसीले सम्बन्धन रोक्न खोजेका कलेज

काठमाडौं नेशनल मेडिकल कलेज, मनमोहन मेडिकल कलेज, पिपुल्स डेन्टल कलेज र नेपाल प्रहरीको मेडिकल कलेजलाई सम्बन्धन दिनै पर्ने दवाबका कारण सायमीले राजिनामा गरेका थिए ।

पिपुल्स डेन्टल विराटनगरको विवादास्पद नोबेल मेडिकल कलेजका सञ्चालक सुनिलकुमार शर्माको हो । नोबेलको ‘गुडविल’ ध्वस्त भएकाले शर्माले पिपुल्स डेन्टल कलेजको सञ्चालकमा साढुभाइलाई राखेका छन् । फ्याकल्टी मेम्बर र भौतिक पूर्वाधारका हिसाबले पनि पिपुल्स डेन्टल सम्बन्धनका लागि योेग्य नभएको जानकारहरू बताउँछन् ।

सम्बन्धन दिन लागिएको काठमाडौं नेशनलका संचालक वीरगञ्जको नेशनल मेडिकल कलेजका मालिक डा. जैनुद्दिन अन्सारी हुन् । वीरगञ्जको नेशनल मेडिकल कलेज देशभरका १९ मेडिकल कलेजमध्ये सबभन्दा खराबको अग्रसूचीमा छ । डा. अन्सारीले पनि भाइ बसरुद्दिन अन्सारीलाई काठमाडौं नेशनल मेडिकल कलेजको प्रबन्ध निर्देशक तोकेका छन् । काठमाडौं घट्टेकुलोमा हाउजिङका लागि निर्मित घरमा यो कलेज खोल्न लागेकोमा सर्वोच्च अदालतमा मुद्दा पनि परेको छ ।

नेपाल प्रहरी मेडिकल कलेजलाई ‘सत्य सेवा सुरक्षणम्’ माथिको प्रश्नचिह्नको रूपमा हेरिएको छ– जनताको जीउधनको सुरक्षाको ग्यारेन्टी गर्नुपर्ने निकाय कलेज सञ्चालनमा उद्यत भएकोले ।

प्रतिकृया दिनुहोस