थप समाचारसोमबार, माघ २०, २०७०
जलपाइगुढीमा ४ जना जिउँदै जलाइए
गाईगोरु चोरी गरेको आरोपमा पश्चिमबंगालको जलपाइगुढी जिल्ला आमबाडी बजार नजिकै चार जनालाई जलाइएको हो । आमबाडी बजारका गाउँलेले १९ माघमा चार जनालाई जलाएर मारेका हुन् ।
उनीहरुमध्ये दुई जनालाई मारुती भ्यानभित्र र अरु दुई जनालाई कुटेर मारे पछि जलाएको सिलिगुढीबाट प्रकाशित नेपाली अखबार हिमालय दर्पणमा उल्लेख छ । भ्यानभित्र एउटा बाछो पनि जलेर मरेको छ ।
मारिने चारैजना भारतको सिमावर्ती बस्तिबाट गाईगोरु बंगलादेश तस्करी गर्ने गिरोहमध्येका हुनसक्ने अनुमान छ । भारतमाभन्दा बंगलादेशमा गाईगोरुको मोल तीन गुणा बढी हुने भएकाले त्यहाँ पशु तस्करी हुने गरेको छ ।
घटनापछि त्यो क्षेत्रमा ठूलो संख्यामा प्रहरी तैनाथ गरिएको छ । पश्चिमबंगाल प्रहरीले अनुसन्धानलाई तीब्रता दिएको जनाएको छ ।
गोपाल गडतौला, हिमालखबर