थप समाचारमंगलबार, माघ २१, २०७०
पेस्तोलसहित एक भारतीय पक्राउ
भारतको बिहार, किशनगञ्ज जिल्लाको बाह्रपोखर पुरन्दर बस्ने ३५ वर्षीय वृषलाल सिंहलाई ‘मेड इन इटाली’ लेखिएको स्वचालित पेस्तोल एक थान, म्याग्जिन एक थान र चार राउन्ड गोलीसहित २० माघ साँझ पक्राउ गरिएको जिल्ला प्रहरी कार्यालयले जनाएको छ ।
भद्रपुर–१ स्थित गौशाला पोखरी टोलस्थित भित्री सडकमा अपरिचित व्यक्तिहरू हिँडडुल गरिरहेको गोप्य सूचनाका आधारमा प्रहरी निरीक्षक देवीप्रसाद पौडेलसहितको टोलीले उनलाई पक्राउ गरेको हो ।
अभियुक्तको खानतलासी गर्दा पाइन्टभित्र लुकाइराखेको अवस्थामा उक्त हतियार बरामद भएको थियो । यस विषयमा थप अनुसन्धान भइरहेको प्रहरीले जनाएको छ ।
प्रहरीले अघिल्लोसाता भद्रपुरबाटै सुपारी र कपडा तस्करीमा संलग्न भारत किसनगञ्जको एउटै टोलका २०जनालाई पक्राउगरि कारबाही चलाइरहेको छ ।
गोपाल गडतौला, झापा