दाङ, घोराहीमा आ–आफ्नो परम्परागत मौलिक पोशाकमा छुट्टाछुट्टै समूह देखा परे । लोकसाहित्यभित्रको महत्वपूर्ण विधा लोकनाटक पछिल्लो समय लोप हुँदै गएपछि लोकनाटकको सँरक्षण गर्ने उद्देश्यले आयोजना गरिएको लोकनाटक उत्सवमा मगर, थारु, खस समुदाय, अवधी भाषीहरु आ–आफ्नो मौलिक परम्परागत लोकनाटक लिएर उपस्थित थिए ।

पहिलोपटक आयोजना गरिएको ‘मध्यपश्चिम तथा सुदुरपश्चिमस्तरीय लोकनाटक उत्सव’ घोराहीमा २७ माघदेखि शुरु भएको हो । उत्सवमा मध्यपश्मिच तथा सुदुरपश्चिमक्षेत्रका मौलिक लोकनाटकहरु समावेश गरिएका छन् । लोक नाच, लोक नाटक र गाथा समेटिएको विधामा मध्य तथा सुदुरपश्चिम क्षेत्रलाई समग्र लोक साहित्यको केन्द्रीय थलोको रुपमा लिईन्छ । लोक संस्कृति लोक हुँदै गएपछि त्यसको सँरक्षण गर्ने उद्देश्यले उत्सवको आयोजना गरिएको उत्सवका निर्देशक डा. गोविन्द आचार्यले जानकारी दिए ।

उत्सवमा मगर समुदायको घाटु, ज्यो मा रे (रोल्पा), ज्यो मा रे (दाङ), डाम्फ्या स्याई, पहाडी समुदायको हनुमान चरित्र र बयलडाँरी (मामै), अवधी समुदायको राजा हरिशचन्द्र लोकनाटक प्रतियोगी लोकनाटकको रुपमा प्रस्तुत गरिएको छ । यसकासाथै सो अवसरमा थारु समुदाको बर्का नाच, मगर समुदायको सरङ्ङया नाच बिशेष प्रस्तुतीको रुपमा प्रस्तुत गरिएको थियो ।

नेपाल संगीत तथा नाट्य प्रज्ञा प्रतिष्ठानको मुख्य आयोजना तथा नेपाल म्यूजिक सेन्टरको सह–आयोजनामा लोक नाटक उत्सवको आयोजना गरिएको हो । नेपाल सँगीत तथा नाट्य प्रज्ञा परिषद्का प्राज्ञ परिषद् सदस्य एवं उत्सवका संयोजक तिर्थबहादुर थापाको अध्यक्षता तथा नेपाल संस्कृति विश्वविद्यालयका उपकुलपति शिवहरी मरहट्टाको प्रमुख आतिथ्यतामा महोत्सवको उदघाटन भएको थियो ।

तस्वीरहरुः देविका घर्ती मगर, घोराही

प्रतिकृया दिनुहोस