राजधानी सहित देशका विभिन्न ठाउँमा तीन दिनदेखि भएको वर्षाले जनजीवन प्रभावित बनाएको छ । मौसम पूर्वानुमान महाशाखाका अनुसार पछिल्लो २४ घण्टामा सबैभन्दा धेरै डडेल्धुरामा वर्षा भएको छ । धनकुटामा भने सबैभन्दा कम पानी परेको छ ।

डडेल्धुरामा ४९ दशमलव ९ मिलिमिटर र धनकुटामा शुन्य दशमलव एक मिलिमिटर पानी परेकोे महाशाखाले जनाएको छ ।

कहाँ–कति पानी पर्‍यो?

मकवानपुरको पर्यटकीय क्षेत्र दामनमा यो वर्ष दोस्रोपटक हिउँ परेको छ । तस्वीरः सुरजकुमार भुजेल/मकवानपुर

महाशाखाका अनुसार पछिल्लो २४ घण्टामा दिपायलमा ३८.९ मिलिमिटर, वीरेन्द्रनगरमा १९.९, नेपालगञ्जमा २०.३, जुम्लामा १४.९, दाङमा १७.८ र पोखरामा ५.४ मिलिमिटर वर्षा भएको छ । यस्तै, भैरहवामा २५.६, सिमरा ६.८, ओखलढुंगामा ०.६, विराटनगरमा ५.१, लुम्लेमा ७.६ र काठमाडौंमा २.९ मिलिमिटर पानी परेको छ ।

जोमसोम र ताप्लेजुङमा वर्षा भएन भने धनगढीमा वर्षा मापन नगरिएको महाशाखाले जनाएको छ । महाशाखाका अनुसार पश्चिमी नेपालका केही ठाउँ बाहेक ४ फागुनमा पनि धेरै ठाउँमा वर्षा भइरहेको छ ।

वरिष्ठ मौसमविद मणिरत्न शाक्य । तस्वीरः हिमाल अर्काइभ

राजधानीमा बिहान र दिउँसो केही वर्षा भएको छ । वरिष्ठ मौसमविद् मणिरत्न शाक्य भन्छन्, “यो प्रि–मनसुन शुरु हुनु अघिको वर्षा हो ।”

अन्तिम हिउँदे झरी

अहिले हिउँद सकिनै लागेको छ । हिउँदमा पश्चिमी वायु पूर्वतर्फ वहन्छ । तर, वर्षा याममा त्यसको ठीक उल्टो पूर्वी क्षेत्र हुँदै वायु पश्चिमतर्फ वहन्छ ।

वरिष्ठ मौसमविद शाक्यका अनुसार हिउँद सकिन थाल्दा पश्चिमबाट चल्ने हावा कम हुँदै गएको र पूर्वबाट हावा वहने समय शुरु हुनै लाग्दा वर्षा भएको हो । तर, यो वर्षा प्रि–मनसुनको नभई हिउँदे यामकै अन्तिम चरणको वर्षा हो ।

उनी भन्छन्, “पश्चिमी वायुको प्रभावका कारण ‘लाष्ट फेज’को वर्षा भएको हो ।” मौसम पूर्वानुमान महाशाखाले पश्चिमी वायुको प्रभावका कारण वर्षा भएको जनाएको छ ।

महाशाखाले अब मौसम सुधार हुँदै जाने दावी गरेको छ । पश्चिमीबाट पूर्व हुँदै मौसम सफा हुँदै आएको महाशाखाले दावी गरेको छ । शाक्य भन्छन्, “भोलीदेखि नै मौसममा सुधार हुन थाल्छ ।”

प्रतिकृया दिनुहोस