दुई महिनाअघि महेन्द्रनगरमा नबिल बैंक डकैती गरेको अभियोगमा प्रहरीको अनुसन्धान टोलीले प्रबन्धकका भाई दिलबहादुर सिंहलगायत शङ्कास्पद व्यक्तिलाई नियन्त्रणमा लिई अनुसन्धान कार्य अगाडि बढाएको छ ।

कैलालीका प्रहरी नायब उपरीक्षक रमेश पण्डितको नेतृत्वमा गठित छानबिन टोलीले केही दिनयता शङ्कास्पद व्यक्तिलाई पक्राउ गरी सोधपुछ सुरु गरेको छ । बैंक कर्मचारी र तिनका आफन्तसमेत अनुसन्धानमा तानिएका छन् ।

यसअघि पक्राउ गरी हिरासतमा राखिका कर्मचारीलाई पनि पुनः सोधपुछका लागि पक्राउ गरिएको छ ।

प्रहरी नायब उपरीक्षक पण्डितले डकैतीमा सोधपुछका लागि पाँच जनालाई पक्राउ गरिएको बताए । ठेकेदार व्यवसायी सिंहलाई चाँदनीबाट पक्राउ गरिएको हो । यसैगरी बैंकका कर्मचारी र सवारी चालकसमेत अनुसन्धानका लागि तानिएका छन् ।

२४ मंसीरमा नबिल बैंक शाखा कार्यालय महेन्द्रनगरबाट धनगढीस्थित राष्ट्र बैंकमा रकम जम्मा गर्न जाने क्रममा मुखमा नकाब लगाएका हतियारधारी समूहले कैलाली र कञ्चनपुरको सीमा क्षेत्र मालाखेतीबाट रु दुई करोड ३१ लाख लुटपाट गरेका थिए । त्यसपछि प्रहरीले बैंकका सवारी चालकसहित २० जनालाई नियन्त्रणमा लिएर छानबिन गरेको थियो ।

गत महिना कैलाली प्रहरीले अनुसन्धानमा केही प्रगति हुन नसकेको प्रतिवेदन सार्वजनिक गरेको थियो । अनुसन्धानमा प्रगति नहुँदा प्रहरीको चौतर्फी आलोचना भएको थियो ।

पछिल्लो पटक सुदूरपश्चिमका प्रहरी नायब महानिरीक्षक जयबहादुर चन्दले नबिल प्रकरणलाई प्रमुख प्राथमिकता राखेर अुनसन्धान टोली दुवै जिल्लामा खटाएका थिए । यसबाहेक शुरुदेखि प्रहरीको केन्द्रीय अनुसन्धान ब्यूरोले पनि डकैती प्रकरणको अनुसन्धान गरिरहेको छ ।

स्रोतका अनुसार दुई सातासम्म शङ्कास्पद व्यक्तिहरूको सूचना सङ्कलन गरी अनुसन्धान टोलीले सोधपुछका लागि पक्राउ गर्न थालेको हो ।
रासस

प्रतिकृया दिनुहोस